Otru fracasu del sindicalismu del réximen. Sobreseída la denuncia de CCOO a la escontra trabayaores de Caxastur por protestar escontra l’ERE fraudulentu

CSI-CAXASTUR (LIBERBANK)

Los díes 17 y 18 xunetu del añu pasáu, decenes de trabayadores de Caxastur concentrámonos delantre de les sedes de CCOO y UXT n’Uviéu, pa protestar pola so firma d’un ERE fraudulentu en Liberbank y pola so complicidá dafechu nos planes de Manuel Menéndez (el Banqueru’l PSOE) pa financiar el so bancu priváu por aciu un brutal plan d’axuste que contemplaba retayos salariales d’hasta un 60% en cuenta de nada.

Esti ERE foi declaráu nulu en payares pola Audiencia Nacional, que condergó a Liberbank, CCOO y UXT per violación del derechu a la Llibertá Sindical.

Díes dempués, un direutivu de CCOO presentaba una denuncia na comisaría policía d’Uviéu indicando que nel intre d’elles habíense realizáu pintaes na paré del edificiu (pagu colos nuesos impuestos) onde comparten despachos, al igual que comparten tantes y tantes coses, CCOO y FADE (la patronal asturiana). Según el testimoniu de dichu lliberáu sindical ensin trabayu conocíu, les pintaes dicíen coses como “xudas”, “corruptos”, “vendíos”, “sindicatu vertical” (ciertes dafechu toes elles, obviamente)

Pa más abundamiento, el delator señalaba a un representante de los y les trabayadores de la CSI de Caxastur como ún de los autores materiales de diches pintaes, acusación falsa dafechu, como pueden atestiguar les decenes de trabayadores que participaron en dicha movilización.

Díes dempués, el mesmu personaxe presentaba una grotesca factura de llimpieza de les pintaes por importe de 900 euros, colo que, amás de consiguir que los fechos denunciaos tuvieren la considerancia de delitu (al superar los 400 euros d’importe), intentaba da-y un emburrionín a les maltrechas arques del sindicatu, onde fai falta enforma dineru pa siguir calteniendo’l chiringu y a los chiringuiteros.

Arriendes de esta denuncia, el xulgáu d’instrucción número 4 d’Uviéu llamó a declarar a dos trabayadores de Caxastur. En base a eses declaraciones y un estensu informe policial dignu de meyor causa, dichu xulgáu dictó un autu de sobreseimientu de les actuaciones dao que “nun apaez debidamente xustificada la perpetración del delitu que dio motivu a la formación de la causa”.

Resumiendo: la denuncia de CCOO contra trabayadores de Caxastur por protestar a la escontra l’ERE fraudulento y a la escontra la so traición, a la basoria.

El mesmu llugar onde tendríe d’acabar esti modelu sindical corruptu y traidor que s’ocupa d’escorrer a quien defenden los derechos de los y les trabayadores demientres se financia a base de roblar EREs y despidos.

Pela nuesa parte, coles nueses modestes capacidaes, nello tamos.