Comunicáu de CSI educación énte la Oficialidá del asturianu

La precariedá na docencia de la Llingua asturiana y el Gallego-asturiano

La especialidá docente de Llingua Asturiana y Gallego-asturiano ye una de les vindicaciones más vieyes que vienen faciendo tolos colectivos en defensa del idioma, y que la Conseyera d’Educación, depués de facer la promesa públicamente hai dos años, daba anuncies el pasáu abril, que se ta trabayando pa la creación de la mesma. ¿Val la pena creer nes palabres d’Ana González depués del maltratu permanente amosáu hacia l’asignatura y al idioma na xestión cultural y educativa del Principáu d’Asturies?

Dende la CSI, prestábamos enforma poder facer casu a les sos palabres y festeyalo al altu la lleva, pero, llamentablemente hai que tener en cuenta que:

El colectivu de maestros, maestres y profesores interinos qu’imparten asturianu o gallego-asturiano, vien sufriendo dende hai dos años retayos na convocatoria de vacantes añales, ufiertaes dende educación cola amortización de places de xornada completa a medies xornaes; recordemos qu’esta última vegada casi’l 50% de les places de xornada completa, pasaron a media xornada “por decretu” y cola xustificación de midía d’aforru económicu. La consecuencia: desestabilización de l’asignatura; a menos hores menos alumnos y alumnes, lo qu’obliga a los centros a reaxuste nes aules, a la escontra de les peticiones de les families en cursar llingua asturiana, que medra añu tres añu.

Otra de les vieyes promeses, que quedó nel tinteru de los suaños, foi la implantación del asturianu / gallego-asturiano na estaya d’Educación Infantil: nin currículum de llingua nin ufierta nos centros, a pesar de la demanda de les families pa que los sos fíos y fíes empiecen yá dende los tres años la escolarización n’asturianu. La rempuesta: falta de profesoráu tamién como midía d’aforru, ente otres.

Cola nueva reforma educativa LOMCE, qu’entama pal cursu qu’entra, de momento nun se sabe cómo va quedar asitiada l’asignatura, responsabilidá del Gobiernu d’Asturies, por dellos motivos, el primeru, por nun ser una de les llingües OFICIALES del Estáu y pola falta de voluntariedá de poner al asturianu onde-y correspuende: asignatura obligatoria a tolos niveles y efectos.

Si a eso-y averamos la nula promoción del asturianu nos procesos de matriculación de les escueles ya institutos, el incumplimientu dafechu de la toponimia oficializada por parte de la Conseyería d’Educación, el maltratu permanente hacia tolo que tien que ver cola llingua asturiana / gallego-asturiano,… fainos pensar nel oportunismu de la Conseyera nesti sentíu y la poca credibilidá de les sos palabres.

Poro, dende la CSI nun queremos desperdiciar la ocasión pa dicí-y al Gobiernu d’Asturies que L’ASTURIANU LLINGUA OFICIAL. YÁ. Nós vamos dir a la Manifestación entamada pola Xunta pola Defensa de la Llingua pal vinres 9 n’Uviéu, a les 19:30 h. ¿Vas faltar?