La seición sindical de la CSI na manconunidá comarca d’Avilés denuncia a l’alcaldesa de Castrillón énte la inspeición de trabayu

La Seición sindical de la CSI na Mancomunidá Comarca d’Avilés, dio en cursar denuncia por acoso llaboral, ante la Inspeición de Trabayu y Seguridá Social a Ángela Vallina Noval, Alcaldesa Castrillón, de resultes de la so actuación énte’l Responsable Sindical de CSI na Mancomunidá.

L’orixe d’esti conflictu ta nos proyectos d’urbanización de la fastera de les dunes de L’Espartal, en Castrillón. El trabayador, Téunicu Ambiental de la Mancomunidá, realizó, por encargu del Conceyu Castrillón un informe nel que les sos conclusiones desaconseyaben la urbanización de la fastera.

Sicasí, el Conceyu Castrillón, llegó a un principiu d’alcuerdu colos promotores ensin consultar en dengún momentu col Téunicu Ambiental que yá nel so día propunxo la necesidá d’enanchar la zona de proteición ambiental

Pa torgar un nuevu informe negativu sobre la urbanización n’El Espartal, la Mancomunidá altrica una pretendía merma llabor p’amenorgar la xornada y la retribución del citáu Téunicu Ambiental, colos esclusivos votos d’Ángela Vallina y Alberto Tirador, cola fin de minar y desacreditar cualisquier posible oposición a esa pretensión d’urbanización.

Esti amenorgamientu xornada y sueldu foi denunciada pola CSI y el Xulgáu de lo Social d’Avilés dába-y la razón, determinando inxustificada esta decisión.

Sicasí, agora, probablemente pa intentar influyir n’otros contenciosos ensin resolver o como represalia, l’Alcaldesa Castrillón, dende hai más de seis meses, nun encamienta llabor al citáu trabayador ya, inclusive, nun permite’l desenvolvimientu de los asuntos en marcha.

Too ello supón un comportamientu denunciable por atentar a la escontra derechos llaborales básicos y resulta inaceptable nuna Alcaldía y, cuantimás, nuna alcaldesa d’Izquierda Xunida.

Pa la CSI, los fechos denunciaos suponen una vulneración de la más elemental derechu del trabayador a la dignidá y a la integridá moral y profesional. Esta situación ta causando un importante perxuiciu al demandante, que se ve priváu, por causa imputable al comportamientu la empresa, del derechu a la ocupación efectiva y nuna situación de total incertidume ante’l so futuru llaboral.

(Fotografía d’Ángela Vallina, d’IX, alcaldesa Castrillón).