Comunicáu de la seición sindical del puertu

CSI-AUTORIDAD PORTUARIA

La Sección Sindical de la Corriente Sindical d’Izquierda na Autoridá Portuaria de Xixón (APX), queremos esclariar les afirmaciones realizaes pol ex-Presidente del Puertu Xixón, Fernando Menéndez Rexach, el pasáu domingu, 13 d’abril de 2014, nel periódicu El Comerciu:

“Nel casu de los materiales de Perecil, personal del puertu apurría a la salida de cada camión, un papel con distintu collor según se tratare de material de rellenu, pedreplén o escollera, pa clasificar la calidá dende l’orixe. Depués, nel puertu, los camiones pesábense y dirixíense al llugar de descarga. Los controles fueron refechos, como nun podía ser d’otra manera, porque yéramos conscientes de que poques obres diben tar más nos güeyos de tol mundu”.

Nesi sentíu, la Seición Sindical de la CSI na APX, queremos destacar qu’esti trabayu de control, calidá y vixilancia, yera realizáu por personal de la empresa privada UT CABO TORRES, una unión de tres empreses, TYPSA, TECNIA INXENIEROS ya INXENIEROS ASESORES, contratada pola empresa privada UT DIQUE TORRES, que realizó la obra d’ampliación del puertu El Musel.

Les factures presentaes por UT CABO TORRES por faer estos trabayos de control, calidá y vixilancia de l’ampliación del puertu El Musel, bien cares a éstes, yeren pagaes pola Autoridá Portuaria de Xixón.

Nunca’l personal propio de la APX realizó estos llabores de control, calidá y vixilancia de les obres d’ampliación portuaria.

Anguaño, la APX nun tien personal propio de vixilancia d’obres, al nun esistir el departamentu del Llaboratoriu, colos sos Vixilantes d’Obres, como, por casu, sí tenía’l puertu El Musel pa les obres de la sablera Poniente.

La Seición Sindical de la CSI na APX nun va dexar que s’utilice a les y los trabayadores de la APX como los auténticos responsables de los posibles fallos que se cometieren nes obres d’ampliación del puertu El Musel. Que naide tenga la menor dulda de que vamos defendenos.

Abondo tenemos les y los trabayadores suxetos a conveniu na APX con cobrar los salarios per baxo la tabla salarial de 2008, carecer una continua precariedá llaboral y la destruición, siguida nel tiempu, de la plantía fixa, con un ERE ENCUBIERTU.

Anguaño, la plantÍA suxeta a conveniu na APG consta de 116 trabayadores fixos de plantía, otros 22 con xubilación parcial, 21 con contratu temporal y 1 con contratu indefiníu.

Dende l’añu 2009 l’amenorgamientu plantía fixa ye d’un 20% y sigue amenorgándose con esti ERE ENCUBIERTU que vamos siguir combatiendo dende esta Seición Sindical.