La CSI desixe al presidente colombianu’l fin de los asesinatos en Trujillo (Colombia) y el castigu de los responsables

La Corriente Sindical d’Izquierda, que forma parte del grupu sofitu al Programa Asturianu d’Acoyida a Víctimes de la Violencia en Colombia, empobinó una comunicación al presidente de Colombia, Juan Manuel Santos, desixendo les midíes afayaíces pa poner fin a los asesinatos de defensores de los Derechos Humanos en Trujillo (Colombia), a manos de grupos paramilitares.

Na Corriente Sindical d’Izquierda conocimos les nueves amenaces y atentaos sufiertos por familiares de les víctimes de la masacre de Trujillo.

Resúltanos estrañu qu’esistiendo condena de la CIDH non se protexa la integridá d’esta xente valeroso. Recordamos con dolor a la señora Alba Mery Chilito, matriarca de les víctimes de Trujillo, asesinada a tiros en plenu centru de la ciudá l’añu anterior.

L’Asociación de Víctimes de Trujillo recibiere’l Premiu Internacional DDHH del Ayuntamientu Siero en 2011. Esi mesmu añu una Delegación Asturiana encabezada pol Direutor de Cooperación del Gobiernu asturianu, visitare a l’Asociación de Víctimes nel so parque-monumentu a la memoria que tienen en Trujillo, Valle del Cauca.

Alba Mery Chilito Peñajue, de 65 años, foi tirotiada por paramilitares demientres trabayaba na so pequena tienda nel parque. Ella tenía al so cargu un nietu de 9 años. La selmana pasada otros familiares fueron tirotiaos nel so carru, y la capiya’l parque monumentu sufrió desperfeutos qu’atestigüen l’altu grau d’impunidá del terror en Trujillo y la presencia y control paramilitar.

En Trujillo y en Asturies, l’Asociación de Víctimes venía denunciando qu’aquel territoriu siguía en manes paramilitares, ensin que les autoridaes militares y civiles faigan nada, magar les midíes cautelares indicaes pola Corte Interamericana. La relixosa dominica Maritze Trigos, que tuviera en Siero pa recibir el Premiu DDHH, salvóse por casualidá de ser prindada por bandes paramilitares a la salida la ciudá de Trujillo.

Por too ello:

DESIXIMOS al Estáu colombianu una investigación darréu y serio, verdá sobre los fechos asocedíos y castigu a los responsables.

Al denunciar públicamente los fechos atroces asocedíos, tamos esixendo, al empar, qu’esti casu nun quede na impunidá, como la mayoría los casos de AFAVIT, que dempués de 20 años siguen impunes.

Demandamos garantíes de seguranza pa les y los miembros de AFAVIT y meyores condiciones de seguridá pa la población de Trujillo.

Entrugamos los motivos polos que’l coronel Urueña, condergáu en firme como ún de los carniceros de Trujillo, sigue protexíu y ensin cumplir la so sentencia.

http://www.eltiempo.com/justicia/ARTICULO-WEB-NEW_NOTA_INTERIOR-13751255.html