Manifestación “Nin una parada nin un paráu nin un zarru d’empresa más n’Asturies”

ASAMBLEES DE TRABAYADORES EN LLUCHA N’ASTURIES

Les Asamblees de Trabayadores en Llucha n’Asturies faen un llamamientu al Pueblu Asturianu a participar na manifestación que, col lema “¡Nin un paráu nin una parada nin un pieslle d’empresa más n’Asturies!, va tener llugar el próximu xueves, 20 de marzu, a les 19:00 h. na Plaza L’Humedal de Xixón.

La llista d’empreses pesllaes n’Asturies, dende va unos años, ye interminable. Dellos datos ponen de relieve que, nos caberos cinco años, podríen haber pesllaose unes 4.000 empreses n’Asturies, munches d’elles, dempués d’esbardiar importantes subvenciones públiques.

Asina, lleguemos a la situación d’anguañu: más de 100.000 persones en paru, el 40% d’elles yá nun tien denguna triba d’ingresu, ente 35.000 y 40.000 families asturianes tienen a tolos sos miembros en paru; ente un terciu y la metada los y les pensionistes cobren menos de 600 euros, más del 60% la mocedá ta ensin empléu y la probitú entama afeutar a un porcentaxe cada vegada más grande de la población.

Asturies nun puede permitise nin un paráu nin una parada nin un pieslle d’empresa más; tenemos la obligación de lluchar y resistir con toles consecuencies, porque vanos la vida nello. La nuesa y la de los nuesos fíos y fíes. Nun vamos consentir que desmantelen Asturies y la tornen nun desiertu ensin otra alternativa que la emigración o la probitú.

Vamos siguir la marraza y a ganar na cai lo que nos roben nos despachos.

CONVOQUEN: ASAMBLEES DE TRABAYADORES EN LLUCHA N’ASTURIES (Tenneco, Benito Sistemes, Caxastur, Fundición Nodular, intoxicaos por mercuriu n’Azsa, Cocines Asturianes, Cébrano, Mataderu Central, Subcontrates Hunosa, Coca-Cola, General Dynamics, Llavandería Cabueñes, Starglass, Sedes, Hotel León, R.Urogallu, Carter@s d’Asturies…).