¡Asturies en pie! denuncia la persecución de trabayaores de la minería, por Gabino de Lorenzo y la Guardia civil

Comunicáu:

Les organizaciones sindicales y coleutivos sociales que formen parte de ¡Asturies en Pie! quieren denunciar públicamente, la persecución que siguen sufriendo los trabayadores de la minería y militantes de la Corriente Sindical d’Izquierda, na cuenca de Cangas del Narcea, per parte del Delegáu del Gobiernu, Gabino de Lorenzo, y la Guardia Civil.

Dende va tiempu, estos trabayadores tán sufriendo siguimientos constantes dende les sos cases, persecuciones per carretera, controles inxustificaos ya, inclusive, la realización repitida de controles en bien pocos kilómetros.

Anguaño, estos trabayadores tán siendo procesaos xudicialmente pola so participación activa nes movilizaciones mineres y na so llucha constante contra les inhumanes condiciones llaborales que s’imponen na minería privada del occidente asturianu, cola resultancia de pergraves pidimientos de cárcel y multes millonaries.

Dende ¡Asturies en Pie! entrugámonos ¿qué ye lo que se pretende?. Nun ye la primer vegada qu’asoceden esta clase de coses, y siempres resulten ser el preludiu de montaxes policiales de la triba que yá s’intentaron, por casu, arriendes de les detenciones producíes demientres la pasada fuelga xeneral del 14 payares.

Lo que ta asocediendo n’Asturies y nel Estáu español, nun ye de recibu. Nun tamos dispuestos nin dispuestes a dexar que millones de paraos y paraes tengan que comer de lo qu’atopen na basura, que cientos de miles de persones, orixinaries o inmigrantes, muerran a les puertes de los centros sanitarios nos que namás s’atienda a quien tengan dineru pa pagalo. Nun vamos dexar que, otra vegada, namás los ricos tengan accesu a los estudios. Nun vamos dexar que les persones con necesidá d’atención social, acaben tiraes peles cais. Nun vamos dexar que tou eso asoceda mientres banqueros, empresarios, especuladores y políticos corruptos amasen fortunes y trátennos como si fuéramos mercancía d’usar y tirar.

(Formen parte de ¡Asturies de pies!: CSI, CGT, CNT, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU.