Mural en sofitu de la revolución bolivariana en Venezuela

CSI-INTERNACIONALISTES.

COMUNICÁU DE LA CSI NEL PRIMER ANIVERSARIU DE LA MUERTE D’HUGO CHÁVEZ

El miércoles 5 marzu cúmplese un añu de la partida del presidente Hugo Chávez, y dende la Corriente Sindical d’Izquierda sofitamos les actividaes n’alcordanza de la so presencia moral y político, como la convocada énte la Casa Sindical de Xixón a les 18:00 h.

Énte les recién agresiones fascistes en Venezuela , que supunxeron yá 18 muertos, enmarcaes nos nuevos planes de desestabilización dirixíos a la escontra’l gobiernu democráticu y constitucional de Nicolás Maduro, la CSI quier espresar la so:

-Reconocencia y condolencias a les víctimes de la violencia fascista, y a los sos familiares. Violencia que foi desamarrada non yá a la escontra persones con significación nel compromisu y la llucha social sinón tamién a la escontra organismos ya instituciones gubernamentales. Estos actos execrables fueron paralelos a un plan trazáu d’agresión económica que recuerda’l yá clásicu manual golpista emplegáu en Llatinoamérica en décades pasaes y que dexó la entronización de sanguinaries dictadures, como la de Pinochet.

-Repulsa a la manipulación informativa de les corporaciones mediátiques nel Estáu español, que repiten la connivencia del golpe en 2002 y tapecen qu’en Venezuela hai un inmensu movimientu de base bolivariano de calter cívicu, pacíficu y democráticu, auténticu motor de los tresformamientos hestóricos y exemplu pa munchos países que lluchen a la escontra’l subdesarrollu.

-Sofitu a los barrios, a la clas obrera y a tol pueblu bolivariano qu’en Venezuela llucha pa conquistar la paz, premisa indispensable pa siguir coles meyores sociales. Afalamos a implementar la solidaridá internacionalista, espresada tamién pol Comandante Chávez como la Diplomacia de los Pueblos.

Xuníos vamos ganar al fascismu en cualesquier de les sos manifestaciones y onde quiera que s’esprese.

¡Embaxo les intentonas golpistes!. ¡Puxa’l Pueblu Bolivarianu!.