La CSI algama que MAPFRE reconoza l’accidente por intoxicación de cloru nes piscines d’Avilés

El pasáu vienres, 14 febreru, nes dependencies de los xulgaos d’Avilés, roblóse un alcuerdu ente 3 monitores de natación de la Fundación Deportiva Municipal d’Avilés, que resultaron intoxicaos por cloru nel so puestu trabayu en 2008, y la empresa aseguradora, MAPFRE, cola que, dicha Fundación, tenía contratada una póliza seguros.

Nesti alcuerdu, ratificáu pol xulgáu avilesín, l’aseguradora reconoz la esistencia l’accidente, xunta toles sos secueles, y afítense les indemnizaciones en conceutu de los daños sufríos pola intoxicación y diches secueles, qu’ascienden a 105.000 €.

Por cuenta de este mesmu accidente, l’Ayuntamientu d’Avilés tuvo qu’indemnizar, enantes, a un cuartu monitor de natación pola cantidá de 105.000 €, en conceutu de Recargu Prestaciones.

Amás d’ello, inda ta pendiente la reclamación de Recargu Prestaciones pa los trés monitores que, agora, ven reconocíu xudicialmente el so accidente, magar que l’Ayuntamientu sigue negando la so esistencia.

Coles mesmes, el montu total de les indemnizaciones y los recargos de prestaciones puede llegar a xubir a más de 300.000 €.

Tou esti asuntu entá ye mas grave si se tien en cuenta que, güei, los socesivos conceyales de deportes y el xerente la Fundación siguen negando la intoxicación y nin hai responsables nin esiste midía dalguna pa depurar responsabilidaes.

Mentantu, nos años siguientes al accidente, les incidencies nes piscines municipales fueron numberoses (desallugos per acumuladura gases, trestornos de piel y de les víes respiratories de los y les trabayadores, continues denuncies n’Inspección de Trabayu, Sanidá ya Institutu de Prevención de Riesgos, etc.) y les condiciones llaborales nes piscines municipales d’Avilés siguen siendo les mesmes.

Sicasí, l’actitú del Ayuntamientu de la Fundación Deportiva Municipal tórnase implacable cuando se trata d’actuar a la escontra los y les trabayadores.

A manera d’exemplu, en 1999, un accidente d’un militante de la CSI, declaráu como fortuítu na sentencia xudicial, con resultancia del francimientu d’un ascensor de minusválidos, supunxo una sanción de 13 díes d’empléu y sueldu y más de 4.000 €. de multa. Claro que, nesi casu, tratábase d’un monitor, non del conceyal, el xerente o’l xefe caltenimientu.

Sicasí, una intoxicación masiva por cloru con resultancia de 2 trabayadores lisiaos pa tola vida, otros dos con secueles permanentes y cientos de miles d’euros n’indemnizaciones, non solo nun producen depuración de responsabilidaes y sanciones, sinón que, pa mas vergoña y escándalu, sigue negándose dichu accidente y castigando a los y les trabayadores que resultaron victimes de la intoxicación.

Dende la CSI, tenemos la firme determinación de siguir nel nuesu camín d’algamar toles compensaciones y resarcimientos a que tengan derechu los y les trabayadores y a desixir la depuración firme de responsabilidaes de quien, encerriscaos en negar la realidá, caltienen una situación que podría dar llugar a nuevos daños irreparables na salú pública y de los y les trabayadores de les piscines municipales.