Concentración de sofitu a Marco Antuña (de Caxastur-Liberbank) denunciáu por CCOO

¡ASTURIES EN PIE!

El próximu miércoles 26 de febreru, Marcu Antuña, delegáu sindical de la CSI en Caxastur, va declarar nos xulgaos de La Pola Siero, pola acusación presentada contra él por CCOO, por participar nuna protesta a la escontra l’ERE fraudulento anuláu pola Audiencia Nacional y que fuera robláu por CCOO y UXT en complicidá dafechu colos planes de Manuel Menéndez (el Banqueru’l PSOE), pa financiar el so bancu priváu por aciu un brutal plan d’axuste que contemplaba retayos salariales d’hasta un 60% en cuenta de nada.

El 18 xunetu de 2013, segunda xornada de les movilizaciones a la escontra la firma l’ERE, el cimeru mandatariu de CCOO en Liberbank, Carlos Genillo, procedente de Castiella La Mancha, refugó dar esplicaciones alrodiu la so traición a los y les trabayadores concentraes delantre’l local del so sindicatu, al salir d’una xunta (namás p’afiliaos, anque roblaron los retayos pa que nos los aplicaren a toos). Ante la so negativa, los y les manifestantes aportunaron nes sos demandes de respuestes, polo que, dempués d’un conato de mediu maratón, el susodichu direutivu sindical acabó abellugándose na Comisaría de Policía allugada frente al Hotel de la Reconquista.

Agora, Marco ta acusáu de realizar actos vandálicos nes parés, les puertes y el hall de los llocales de CCOO. Pero nun va tar solu; ¡Asturies en Pie! va tar con él el próximu miércoles 26 de febreru, a les 10:15 h., nos xulgaos de La pola Siero, y pidimos la vuesa solidaridá p’algamar l’archivu darréu de la causa abierta a la so escontra.

¡NIN UNA PERSONA SOLA ÉNTE LA REPRESIÓN!. ¡NIN UNA PERSONA SOLA NA LLUCHA POLA XUSTICIA SOCIAL!.

(Formen parte de ¡Asturies en Pie!: CSI, CGT, CNT, SUATEA, FUSOA, Centru Social Autogestionado La Semiente, Centru Social Sestaferia, Asociación Picu Rabicu, Muyeres en Llucha, Para@s y Precari@s d’Asturies…).