Constituyóse la seeción sindical de la CSI nos Planes “inserta” del Conceyu de Xixón

En feches recientes constituyóse la sección sindical de CSI nos planes INSERTA del Conceyu Xixón, col enfotu de defender los derechos llaborales de les y los trabayadores acoyíos a los mencionaos planes d’empléu, y denunciar públicamente’l chanchulléu que constituyen estos planes.

Un total de 468 persones tán anguañu empleaes baxo estos planes en diverses categoríes. D’estes 468 persones, 164 diben acabar, en principiu, contratu esti próximu 28 de febreru, en concretu les pertenecientes a l’ampliación de la bolsa de la 2ª edición, y que empezaron el so contratu el pasáu 11 de payares. Dempués d’una serie de quexes pela parte d’esti grupu trabayadores, que demandaben un allargamientu de contratu por dellos meses pa tener derechu a prestaciones por desempléu y/o subsidios, l’Ayuntamientu concedió-yos una “prórroga” de namás 10 díes pa redondear los 4 meses de contratu, lo que constituye una chapuza y una burla pela parte de la Conceyalía d’Empléu de Xixón, más teniendo en cuenta los exiguos salarios que perciben la mayoría de les categoríes profesionales d’esti Plan, dalgunes de les cuales perpasen por poco’l salariu mínimu profesional, gracies a un Conveniu firmáu por UGT y CCOO y que establez una tabla salarial mui por debaxo de lo que marca’l Conveniu del funcionariáu y personal llaboral del propiu Ayuntamientu. Otra venta a la baxa de los derechos llaborales de les y los trabayadores pola parte d’estos dos sindicatos, y tovía habrá quien diga que tenemos que “dar les gracies” y “nun quexanos” que tal como tá la cosa ye “un luxu” tener un empléu miserable. Méxennos enriba y dicimos que llueve.

Estos planes d’empléu nun son otra cosa que un maquillaxe de les estadístiques sobre desempléu, y una válvula d’escape que permite, polo menos nuna pequeña parte, aliviar la tensión d’una clase trabayadora cada vez más acuciada nes sos necesidaes básiques (vivienda, alimentación, sanidá…) y emprobecida polos continuos ataques del Capital, una válvula d’escape pa un Conceyu nel que hai casi 30.000 persones ensin un empléu y ensin dengún ingresu que-y permita subsistir en condiciones medianamente dignes, pa que esta ciudá y esti conceyu nun se conviertan nel caldu de cultivu propiciu pa un estallíu social.

Estos planes d’empléu son tamién un experimentu de llaboratoriu, sobre’l terrenu, de les nueves condiciones llaborales implantaes tres les últimes Reformes Llaborales: eliminación de puestos de trabayu estables pa sustituilos por trabayadores con contratos precarios y temporales e implantación sicolóxica ente la clase trabayadora del conformismu ante esta nueva situación llaboral…

Pa denunciar too esto y más precisamente constituimos esta sección sindical. Porque nun nos conformamos cola precariedá y los sueldos de miseria, porque naguamos por unes condiciones llaborales y sociales dignes pa la clase trabayadora, porque lluchamos pa frenar los continuos ataques del Capital, porque lo queremos too y más…