Despidu nulu del representante sindical de la CSI n’Instalaciones Elléutriques Sanvicente

El Xulgáu de lo Social de Xixón acaba de declarar nulu’l despidu d’Abelardo, representante de la Seición Sindical de la Corriente Sindical d’Izquierda na empresa Instalaciones Eléctriques Sanvicente, subcontrata de HC-Enerxía/EDP. La sentencia apareya la realmisión obligatoria del trabayador nel so puestu trabayu.

Magar que la empresa inda puede interponer, nel plazu cinco díes, un recursu énte’l Tribunal Superior de Xusticia d’Asturies, la sentencia ye un pasu perimportante non yá pa’l mesmu trabayador, sinón pa toos aquelllos y aquelles trabayadores que se ven remanaos como una mercancía que los empresarios pueden refugar cuando-yos dea pola gana.

Abelardo caracterizárase pola so defensa de los derechos de los y les trabayadores, énte los continuos abusos empresariales. Prueba de la persecución sindical de la empresa Sanvicente a la escontra esti trabayador, ye’l fechu de que foi despidíu darréu dempués de notificar a la empresa la so condición de representante sindical de la CSI.

Concentraciones, acampaes, ocupaciones d’oficines, manifestaciones, acción xurídica…, tola llucha llevada alantre demientres dellos meses, dio llugar a esta perimportante victoria, qu’esperamos fáigase definitiva nos próximos díes.

¡Que viva la llucha de la clase obrera!
¡Nin despidos, nin pieslles!