Nengún ser humanu ye illegal. Basta de represión escontra les persones inmigrantes

CSI-Internacionalistes

Siquier 13 inmigrantes morrieron al intentar pasar de Marruecos al Estáu español pol puestu fronterizu del Taraxal en Ceuta, el pasáu xueves 6 de febreru.

Según testigos presenciales, les fuerces represives del Estáu, concretamente la Guardia Civil, dispararon pelotes de goma, gases lacrimóxenos a la escontra los inmigrantes pa torgar la entrada de los subsaharianos, que’l so únicu delitu fuere intentar fuxir d’una muerte anunciada, nel so propiu país, a la que fueron condergaos pol criminal sistema capitalista.

La colonización occidental, entá vixente, róba-yos día ente día les sos riqueces, provoca guerres, arma a los señores de la guerra a la escontra la soberanía de los pueblos y una vida digna pa los sos habitantes. Pa les persones que se ven emburriaes a buscase una vida meyor, fora del so continente, la respuesta d’Europa ye cerrar de trancón les fronteres y tornar la so esperanza en persecución y dolor.

El Gobiernu, al traviés de los sos voceros, el Ministru d’Interior y el Delegáu de Gobiernu en Ceuta, defendió l’actuación de la Guardia Civil ya inclusive foi más llueñe, alegando violencia estrema de los inmigrantes, xustificando asina la so intervención, que’l so únicu propósitu foi torgar la entrada en territoriu del Estáu español, entá a costa de vides humanes.

Ante estos tarrecibles fechos, la CSI quier espresar la so más absoluta condena, solidarizase coles victimas y esixir:

-Investigación imparcial de los fechos.
-Depurar responsabilidaes nes fuerces de seguridá..
-Inmediata dimisión del Delegáu del gobiernu en Ceuta.
-Retirada de les concertines y de la mesma valla fronteriza..
-Anulación de la Llei d’Extranxería, que considera a los inmigrantes meros delincuentes.
-Zarru de los CIES (centros d’internamientu pa estranxeros), verdaderes cárceles pa los inmigrantes que’l so únicu “delitu” ye nun tener papeles.
-Fin d’esta política migratoria de la UE, que nun respeta los derechos de les persones inmigrantes y condena a muerte a tou un continente.
-Dimisión del gobiernu Raxoy, que hipócritamente diz defender la vida de los “non nacíos” pero conderga a muerte y aplica tol rigor de la represión a la escontra seres humanos desarmaos.