La CSI sofita la llucha de los/les estudiantes escontra los recortes na Universidá

El Gobiernu de la Universidá d’Uviéu dio en pesllar una de les biblioteques del Campus de Viesques. Ello encuádrase dientru d’un plan de reorganización de les biblioteques universitaries que nuna selmana llevóse per delantre dos places y treslladó de campus otres dos. Nun nos estraña enforma, porque caberamente l’enclín ye mover personal d’un llau a otru y el mesmu Rector anunció al Claustru que les xubilaciones diben cubrise con comisiones de servicios.
Nun ye necesario recordar, o quiciabes sí, los perxuicios que pal empléu públicu tienen estes decisiones: inseguridá d’ónde va trabayase mañana, amenorgamientu’l coleutivu a mínima expresión, dexándonos entá más débiles frente a la empresa… Pero entá más importante ye la mengua posibilidaes pa les nueses compañeres y compañeros interinos, que viven situaciones angustioses ensin saber si van tornar trabayar, y tamién pa los nuesos fíos y fíes, que pueden dir escaeciéndose de tener un trabayu dignu na Universidá. Nun podemos escaecer que nos 90 l’accesu al empléu públicu salvó a munchos fíos y fíes de trabayadores asturianos de tener qu’emigrar.
Con éses, énte la pasividá xeneral a la vista de los retayos y el retrocesu de derechos, los y les estudiantes d’Inxeniería, como los y les de Bioloxía anantes, nun se resignaron. Después de xelase nes aules, de pagar cada vegada más pola matrícula y de dexar de recibir beques y aídes a los estudios, tamién han quedase ensin una biblioteca. Ellos camienten que nun se puede dar más pasos atrás y por eso decidieron zarrase ellí, torgando que salgan los fondos bibliográficos. Tán dispuestos a aguantar y algamar el caltenimientu’l serviciu.
Poro, dende la CSI queremos amosa-yos el nuesu sofitu y solidaridá. Tán dándonos un exemplu de llucha.

¡NON AL PIESLLE DE LOS SERVICIOS UNIVERSITARIOS!

Eva M. Fernández
Delegada Sindical de CSI-Universidá d’Uviéu