Rueda de prensa d’asamblees y coleutivos de trabayadores d’empreses en conflictu.

A convocatoria de l’Asamblea Trabayadores de Tenneco, na mañana de güei, xueves 23 de xineru, un numberosu grupu d’asamblees y coleutivos de trabayadores d’empreses asturianes en conflictu llaboral (pieslles, EREs, despidos, impagos, etc.), realizaron una rueda de prensa anunciando la creación d’un frente obreru xunitariu a la escontra l’esmantelamientu industrial y económico d’Asturies.

Na rueda prensa tuvieron presentes voceros de los y les trabayadores d’empreses como Tenneco, Benito Sistemes, Caxastur, Fundición Nodular, intoxicaos por mercuriu n’AZSA, Cocines Asturianes, Cébrano, Mataderu Central, Subcontrates Mineres, Coca-Cola, despidíos de la Fábrica d’Armes o Llavandería de Cabueñes, ente otres.

Les y los trabayadores fixeron pública la so intención de xunir toes estes lluches y entamar cuantes iniciatives y movilizaciones sían necesaries pa torgar que la ruina económico y llaboral d’Asturies siga avanzando y dexando a los y les trabayadores coles úniques alternatives del paru y la miseria. Coles mesmes, fíxose un llamamientu pa que cualisquier asamblea o coleutivu trabayadores en conflictu llaboral s’amestare a esta iniciativa.

La primer movilización va tener llugar el próximu vienres 31 de xineru, a les 10:30 h, na plaza la catedral d’Uviéu, énte’l Tribunal Superior de Xusticia, onde va cellebrase’l xuiciu pola demanda a la escontra l’ERE aplicáu pola direición de la empresa Tenneco.

Dende la Corriente Sindical d’Izquierda faemos públicu’l nuesu sofitu a esti frente obreru y la nuesa intención de sofitar, en tou momentu, les sos iniciatives y movilizaciones.