Llamamientu de la C SI a participar na manifestación a la escontra les xubíes eléctriques

ENTAMA: PARA@S Y PRECARI@S D’ASTURIES.

La Corriente Sindical d’Izquierda fae un llamamientu a la clas obrera asturiana a la participación na manifestación a la escontra les xubíes de la tarifa eléctrica y a la escontra’l Gobiernu de Raxoi, convocada por Para@s y Precari@s d’Asturies, que va tener llugar el próximu xueves 9 xineru, a les 19:00 h., na plaza l’Humedal de Xixón.

Con un nivel de paru insoportable, con más de 46.000 paraes y paraos que yá nun cobren denguna prestación nin subsidiu, con unes 40.000 families con tolos sos miembros nel desemplegu y con un nivel de probitú alarmante, la xubida de la tarifa eléctrica ye, a cencielles, una nueva estafa pa que los ricos se faigan entá más ricos y los probes se fundan inda más na probitú.

Si a ello-y amestamos midíes económiques como la conxelación del Salariu Mínimu Interprofesional o la perda poder alquisitivu de les y los pensionistes, cientos de miles de presones van tener qu’escoyer ente comer o encender la calefacción. Asina les coses, el criminal sistema capitalista que nos gobierna, pon en pelligru la vida de presones abondo que, ensin perres pa pagar la calefacción, acaben finando pol agravamientu irreparable de les sos enfermedaes (pulmoníes, neumoníes, etc).

Coincidiendo coles reivindicaciones realizaes por ¡Asturies en Pie!, dende la CSI desiximos un inmediatu y drásticu amenorgamientu de la tarifa eléctrica y el suministru de baldre d’eletricidá pa les families y presones ensin recursos.

Pero, amás d’ello, dende la CSI camentamos imprescindible que seutores estratéxicos como l’enerxéticu, l’alimentariu o’l sanitariu, ente otros, tienen de ser nacionalizaos y puestos al serviciu de la cobertoria de les necesidaes básiques populares.