La CSI denuncia ante fiscalía la prexubilicación fraudulenta del exdirector de Caxastur, Felipe Fenández

La Corriente Sindical d’Izquierda de Caxastur presentó, con fecha 19 d’avientu, una denuncia ante la Fiscalía d’Asturies pola prexubilación de Felipe Fernández Fernández, Exdirector Xeneral de Caxastur, por considerar que se realizó de forma fraudulenta, al nun cumplir ún de los requisitos axustaos nel alcuerdu que regulaba estes prexubilaciones, yá que’l referíu direutivu nun acreditaba diez años d’antigüedá en Caxastur/Liberbank.

Felipe Fernández foi contratáu como direutor xeneral de Caxastur en xineru de 2004 y prexubilóse en xineru de 2013, polo que nun acredita estos diez años d’antigüedá que s’axusten como obligatorios p’aportar a la prexubilación nel alcuerdu robláu en xineru de 2011 ente la dirección de Liberbank y la mayoría sindical, que recueye les condiciones de prexubilación, una de les cuales ye tener diez años d’antigüedá nel momentu de producise la prexubilación.

Pa mayor escándalu, tantu Felipe Fernández como otros dos executivos de Liberbank que se prexubilen al empar qu’él, ocupen puestos nel Conseyu d’Alministración de Liberbank polos que perciben 2.500 euros como prima d’asistencia a cada xunta d’esti órganu. Esta situación yá foi denunciada ante la Fiscalía de Cantabria.

Como pagu de les sos prexubilaciones, estos trés exdirectivos percibieron una remuneración total de 1.280.000 euros, que, nes cuentes de Liberbank, nun se desglosa per caún d’ellos. Según los nuesos cálculos, Felipe Fernández podría habese lleváu 600.000 euros como indemnización pola so prexubilación.

Pa la CSI resulta escandalosu qu’ún de los responsables de la nefasta xestión que llevó al actual procesu de lliquidación/privatización de Caxastur y a Liberbank a la so situación actual (declarando más de 1.800 millones de perdes l’añu pasáu, estafando a los veceros de les subordinaes y les preferentes, enllantando un brutal y fraudulento axuste llaboral que foi baltáu pola Audiencia Nacional, etc.), se lléve una abultada ya inmerecida indemnización, se blinde nel Conseyu d’Alministración de Liberbank cobrando unes dietes inmorales y s’escape (pel momentu, esperamos) de responder poles sos responsabilidaes derivaes de la nefasta xestión de lo que yera la Caxa de tolos asturianos y asturianes y agora ye’l bancu priváu del Banqueru’l PSOE, Manuel Menéndez, y de los sos cómplices.

(Na semeya, en primer planu, Felipe Fernández).