La CSI solidarízase coles comunidaes indíxenes de Chiapas

Cuando van cumplise 20 años de la insurxencia zapatista en Chiapas, la Corriente Sindical d’Izquierda tresllada la so simpatía y solidaridá coles comunidaes y pueblos tzotziles, choles, zoques, mames, tojolabales, tzeltales de Chiapas, y col restu de Pueblos Orixinarios de México y de Abya Yala.

L’aniversariu 20 d’esti fechu históricu en que los pueblos indíxenes de Chiapas llograron sacar de la invisibilidá les sos propuestes de Vida, tien de sirvir pa una reflexón fonda de los llogros innegables en materia de Dignidá y Derechos, y tamién pa siguir señalando les pergraves faltes que les politicas capitalistes de México imponen a los sos pobladores.

La llibertá del maestru tzotzil Alberto Patishtán tres 13 años d’inxusta prisión, anímanos tamién a esixir la lliberación de tolos prisioneros políticos en México.

Les movilizaciones intenses contra la privatización del sector enerxéticu, que muncha unidá xeneraron nel movimientu popular, ilústrennos nes lluches populares n’Asturies y l’Estáu español.

Les demandes de los familiares de los mineros de Pasta de Conchos, que dempués d’ocho año persisten na so esixencia de rescate de los cuerpos abandonaos pola empresa y l’Estáu, facer nueses y compartir, esixendo al gobiernu mexicanu que cese esti abandonu pa con derechos elementales.

El premiu Ariel de la Cinematografía mexicana apurríu a Alberto Cortés, pol so documental sobre Atenco, “la ferida caltiense abierta”, allégranos pola intensa relación ente Atenco y Chiapas cuayada na solidaridá efectiva, y pol fechu de que’l mesmu realizador sía autor de la meritoria pelicula de ficción “Corazón del Tiempo”, realizada en territoriu zapatista.

Recordando qu’Asturies tuvo una fraterna relación d’aprendizaxe para coles demandes y propuestes zapatistas, nesti aniversariu 20 de la insurxencia del EZLN, treslladamos dende la CSI, el nuesu Saludu y Felicitaciones pola Autonomía Indíxena que constrúin acaldía.

Zapata Vive y la Llucha Sigue.