Fuelga nel mataderu central

Tres l’actu de mediación celebráu ayeri nel SASEC, nun se algamó denguna triba d’alcuerdu pa desconvocar la fuelga del prósimu llunes 30 d’avientu, al enrocase la empresa nes sos postures y nun garantizar el pagu los salarios pendientes.

La empresa nun reconoz la delda de les pagues estres de 2013 y pretende amortizales con una supuesta delda de los trabayadores cola empresa dende xineru de 2013, en virtú d’un Alcuerdu robláu en xineru de 2012, que recoyía unos amenorgamientos del 15% y otros d’un 35% susceptibles de ser recuperaos con un sistema d’incentivos que nun se punxo en marcha y que, agora, pretende obviase.

La mesma empresa reconoz, na memoria de 2012, que nun se realizó l’amenorgamientu salarial al nun apareyar un aforru significativo y constituyir una motivación pa los trabayadores.

Talu Alcuerdo tamién recoyía una actualización salarial a salarios de 2013, al haber beneficios nel añu 2012, que nun se quier realizar (anguaño tamos coles tables de 2010).

Los trabayadores pescanciamos que l’Alcuerdu ye un tou, en si mesmu, del que nun se puede coyer solo partes a la carta. Ensin oponenos a l’aplicación de dichu Alcuerdo a partir de xineru de 2014, refugamos la so retroactividá al tener duldes sobre la so llegalidá.