El conflictu de Tenneco enfóncase

La dirección de la empresa Tenneco ingresó les indemnizaciones por despidu na cuenta bancaria de les y los trabayadores de Tenneco. Les cartes de despidu van entamar a llegar de magar la selmana que vien.

El prósimu vienres 27 d’avientu, va producise la cabera xunta ente los y les trabayadores, el Gobiernu asturianu y la eempresa. Esta postrera, con toa probabilidá, nun va asistir.

L’Asamblea Trabayadores de Tenneco decidió por unanimidá, güei, martes 24 d’avientu, nun aceptar diches indemnizaciones y siguir la llucha pol caltenimientu la factoría.

Con poca o denguna esperanza nes resultancies de la xunta del prósimu 27 d’avientu, l’Asamblea Trabayadores de Tenneco va siguir, demientres estes navidaes, coles veces de xixilancia na fábrica, doblándoles pa garantizar la continuidá la maquinaria na planta Xixón.

Los voceros de l’Asamblea manden un mensaxe bien nidiu al Gobiernu asturianu: una empresa que, como Tenneco, tien grandes beneficios, una tecnoloxía avanzao y actualizao y una man d’obra de sobrada calidá (too ello, ratificáo pola auditoría realizada), fainos ver la verdadera cara y les verdaderes intenciones del empresariáu y del capitalismu: aumentar los beneficios a cuenta’l paru, la fame y la miseria de les y los trabayadores.

Y por too ello, el Gobiernu asturianu tien dos alternatives: garantizar la continuidá de la fábrica Tenneco en Xixón o dimitir en plenu, porque si nun son quien a algamar esti oxetivu tan c enciellu, ¿pa qué se supón que sirve un Gobiernu?.

(Na semeya, trabayadores de Tenneco na manifestación de Bruxeles).