La represión continúa

La Corriente Sindical d’Izquierda (CSI) denuncia que la Delegación del Gobiernu en Asturies abre espediente sancionador a dos trabayadores de Cajastur, militantes de la CSI, con multa de 300 a 30.000 euros por participar nuna concentración contra la privatización de la Caxa y contra l’ERE enllantáu pola direición de Liberbank, anuláu darréu pola Audiencia Nacional.

El día 24 d’ochobre, trabayadores de Cajastur/Liberbank, xunta otros coleuitivos ciudadanos aprovecharon el conciertu que, con asistencia de los príncipes d’Asturies cellebrábase nel Auditoriu d’Uviéu, patrocináu pola mesma Caxa pa protestar a la escontra’l procesu de privatización/lliquidación y a la escontra l’ERE naquel momentu vixente na entidá, robláu pola dirección, CCOO y UXT y que darréu foi anuláu pola Audiencia Nacional, en base a una demanda presentada pola CSI y STC-CIC, al violar el derechu a la llibertá sindical del restu los sindicatos de la entidá y de les y los trabayadores por ellos representaos.

La protesta, absolutamente pacífica como’l restu de les que dende fai más d’un añu vienen calteniendo les y los trabayadores de Caxastur trescurrió ensin nengún incidente y respetando en tou momentu los esaxeraos dispositivos de seguridá establecíos por cuenta de la presencia de los príncipes, magar lo cual, a la fin de la mesma, el mandu de los antidisturbios identificó a dos trabayadores de Cajastur, militantes de la CSI, alvirtiéndo-yos de que diben ser propuestos pa sanción por “faer enforma ruiu”.

Dase la circunstancia de qu’al otru día, el Tribunal Cimeru de Xusticia d’Asturies anulara la prohibición per parte de la Delegación de Gobiernu d’Asturies d’una concentración solicitada polos mesmos trabayadores de Cajastur na Plaza la Escandalera, coincidiendo col actu d’entrega de los Premios Príncipe d’Asturies.

Agora, la mesma Delegación de Gobiernu, no qu’a les clares representa una vendetta personal del Delegáu del Gobiernu n’Asturies, Gabino de Lorenzo, abre un espediente sancionador a dos trabayadores de Caxastur, militantes de la CSI, con sanciones de 300 a 30.000 euros, alegando que “dirixíen” la concentración citada y que, con un megáfonu y una bocina emitíen “un ruiu cafiante y ensordador tantu pa los rexuntaos y viandantes como pa los invitaos como pa les autoridaes qu’allegaben al conciertu, ruios qu’algamaron la so máxima puxanza nos minutos previos a la llegada de SS. AA. RR., los Príncipes d’Asturies y nel momentu que estos fixeron actu de presencia nel esterior del Auditoriu”.

La CSI quier denunciar que, adelantrándose a la Llei d’Orde Públicu por aciu la cual el gobiernu de Rajoy quier tarazar les llibertaes públiques polo xeneral y el derechu a la protesta social en particular, el Delegáu del Gobiernu n’Asturies, Gabino de Lorenzo pretende torgar que quien tamos sufriendo los retayos, los despidos, el pillaxe de los banqueros y los sos cómplices políticos y tolos efectos d’esta estafa que llamen crisis podamos exercer el nuesu derechu a protestar y a reivindicar los nuesos derechos.

Per parte de la CSI presentóse’l recursu correspondiente a la escontra les propuestes de sanción citaes.