Comunicáu de CSI-Hidroeléctrica/EDP en sofitu a los compañeros despidíos d’I.E.Sanvicente (subcontrata de HC/EDP)

CSI-HIDROELÉCTRICA/EDP

Dende CSI nel grupu HC-Enerxía manifestamos el nuesu sofitu y solidaridá colos despidíos de la empresa d’instalaciones eléctriques Sanvicente.

La mayor represión que la patronal puede exercer sobre un trabayador ye’l despidu, si ésti ye amás con argumentos miqueros, como asocede nesti casu, la rempuesta de tolos y toles trabayadores tendría de ser conxunta y contundente.

Toles empreses tán aprovechándose de la situación económica y de les potestaes que-yos otorga’l gobiernu, d’anguañu, al que son allegaos por intereses puramente económicos, nun duldando n’estrumir a les y los sos trabayadores remanándolos como una ferramienta que puedan refugar cuando-yos venga en gana, escaeciendo qu’eses y esos trabayadores son los verdaderos artífices de los beneficios y riqueza de les empreses.

Refugamos de la pasividá del Grupu HC-Enerxía nesti casu, pos tenemos de recordar que Sanvicente ye una empresa collaboradora del Grupu, cimeramente de HC-Distribución y una de les polítiques de la nuesa empresa ye velar porque los y les trabayadores de les subcontrates reciban un tratu dignu, y el despidu nun ye precisamente eso, sinón tolo contrario, entá asina, en HC mírase a otru llau.

¡NON A LOS DESPIDOS!. ¡SÍ AL RESPETU A LOS Y LES TRABAYADORES Y LA SO DIGNIDÁ!.