Nuevos problemes de salú llaboral nes piscines municipales d’Avilés

CSI-AYUNTAMIENTU D’AVILÉS

Demientres años, la CSI denunció les condiciónes ambientales de les piscines d’Avilés, que dieron llugar a dellos episodios d’intosicaciones nos puestos de trabayu de diches piscines, que los sos cimeros esponentes fueron los dos casos d’incapacidá total de dos monitores municipales.

Magar les indemnizaciones millonaries que’l conceyu d’Avilés tuvo y va tener qu’encarar, dineru que va salir de tolos avilesinos y avilesines, non yá síguise negando esta situación sinón que recúrrese a la mentira y la descalificación, aduciendo que namá la CSI denuncia estes situaciones valiéndose d’invenciones y mentires.

Nel mes d’ochobre tolos trabayadores de la empresa EULEN, concesionaria de la privatización del serviciu de monitores y socorristes de les piscines municipales, y los entrenadores del CNA, roblaron un documentu qu’alzaron a la conceyala de deportes, señalando lo mesmo que veníen diciendo demientres años y años les y los monitores municipales.

Paez qu’aquelles argumentaciones sofitaes en que “son 4, son radicales de la CSI, son problemes personales y namás busquen desestabilizar”, caen pol so propiu peso ante les mentires yá impunidá de los mandos.

La situación nun camudó, nel caberiu mes: dellos monitores tuvieron qu’allegase a los servicios médicos de la mutua llaboral, colos güeyos estropiaos, erupciones graves de piel, problemes respiratorios, etc.

La CSI presentó la correspondiente denuncia énte la Inspección de Trabayu, y quier faer pública la so denuncia énte’l deterioru de la salú de los y les trabayadores y usuarios y usuarias y la pasividá del equipu Gobiernu y la oposición municipal.

La Fundación Deportiva Municipal paez un tarrén pantanosu, opacu y cortixero con accidentes pergraves, inxente cantidá de dineru públicu volatilizada en constantes obres que’l so beneficiu nun se ve per dengún llau y despreciu a la salú yá integridá de trabayadores y usuarios y usuaries (yá en 2008, ante la formación d’una asociación d’usuariosy usuaries pola llamentable y tercermundista situación de les piscines, con plagues de viermes incluyíes, peslláronse un añu enteru y gastáronse millones. En 2010, tornaron pesllala, y mas millones).

Les obres son l’estáu permanente de toles instalaciones municipales deportives, pero les resultancies son trabayadores intosicaos, trabayadores lisiaos pa tola vida, indemnizaciones millonaries, dengún responsable y la negación de too ello poles autoridaes, magar los resolvimientos de la Seguridá Social y l’Inspección de Trabayu.

Dende la CSI queremos faer pública la nuesa denuncia, desiximos la depuración de responsabilidaes y la meyora de les condiciónes llaborales con cuenta de torgar que les intosicaciones qu’agora tán produciéndose, nun deriven en mas casos de trabayadores xubilaos prematuramente con mancadures inreversibles, demientres los responsables siguen nos sos puestos, riéndose de la intelixencia y de la verdá.