Manifestación escontra’l paru, por un trabayu dignu y un salariu xustu

CONVOCA: PARA@S Y PRECARI@S D’ASTURIES.

La llista paraos y paraes n’Asturies vuelve superar los 100.000. Somos más y siguimos xorreciendo. Endurecieren les reformes llaborales hasta práuticamente desaniciar les prestaciones por desempléu. Y precarizaron tanto les condiciones llaborales que cada vegada tamos más aprobetaos, magar que tengamos trabayu.

Acaldía vemos más paraos y paraes que nun cobren nada; bien porque se-yos terminó la prestación y siguen ensin atopar un empléu, o bien porque nun tienen derechu a subsidiu por cotizar menos de 6 meses. Esti ye’l casu de milenta de muyeres dedicaes a la unidá familiar, emplegaes del llar, de la llimpieza o del cuidu de vieyos y neños. En munchos casos, son mas con fíos al so cargu que tienen qu’esperar hasta 19 meses pa cobrar el salariu social.

Vemos cómo la mocedá tien qu’emigrar pa consiguir un contratu basura nel estranxeru que-yos dexe sobrevivir, o quedase equí, viviendo colos sos pás, viendo cada vuelta más llueñe la oportunidá d’entamar la so propia vida.

Miles d’asturianos y asturianes, y en munchos casos families enteres, malviven con 426 euros mensuales pa pagar la vivienda, la comida, les melecines, l’atención psicosocial, el material escolar, etc.

Tamién vemos como siguen los despidos, los pieslles d’empresa, los retayos en sanidá, educación, pensiones y prestaciones sociales.

Toa esta catástrofe, esti esmantelamientu d’Asturies nun ye un castigu de los dioses, sinón que ye un plan centralizáu lleváu alantre pol gobiernu asturianu del PSOE, qu’acata les ordes del Gobiernu central del PP de Raxoy, que de la mesma obedez ensin gorgutar les esixencies de la Unión Européa. Y too ello con representantes políticos y sindicales (CCOO y UXT) robando dineru del paru ya invirtiéndolo nel mercáu prietu como nel casu de los EREs andaluces, etc.

Toos ellos son los responsables d’esta cris y de la nuesa miseria. Por eso salimos a la cai pa esixi-yos a estos gobiernos un empléu con derechos o un salariu pa poder vivir. Dineru pa crear puestos de trabayu hai, ye’l dineru que se tán gastando pa rescatar a la banca privada, mientres a les y los trabayadores únviennos al paru y la miseria.

-Esiximos un EMPLÉU con DERECHOS o un SALARIU pa poder VIVIR

-Nin un euru más a la banca, queremos puestos de trabayu.

-Fora’l Gobiernu asturianu, Raxoy y la Xunión Europea.