Llamamientu de la CSI a participar na manifestación escontra’l paru del xueves 28

La Corriente Sindical d’Izquierda fae un llamamientu a la clas obrera asturiana, a participar na manifestación a la escontra’l paru, por un trabayu dignu y un salariu xustu, convocada por Para@s y Precari@s d’Asturies, pa mañana xueves, 28 payares, a les 19:00 h., na plaza L’Humedal de Xixón.

Con 120.000 trabayadores en paru, Asturies nun puede permitise nin un solu paráu o parada nin un solu despidu nin un solu pieslle d’empresa nin una sola hora estra más.

El númberu presones en paru que yá nun cobren nada, aumenta darréu; al igual que’l númberu de families con tolos sos miembros en paru. El restu malvive con subsidios o aídes de 426 € o vese obligáu a emigrar.

Y el pocu trabayu qu’hai ye precariu, casi siempres ensin cotización a la Seguridá Social pa toles hores trabayaes, con sueldos que nun merecen esi nome, con escesu d’hores de trabayu so amenaces de despidu, con parte del sueldu pagu en prietu, etc.

Pero, el Gobiernu del Estáu español lleva inyectaos cientos de miles de millones d’euros en bancos privaos y caxes, el fraude fiscal de les grandes fortunes xube a 80.000 millones d’euros añales, la economía somorguiada mueve casi 250.000 millones d’euros, la Xunión Europea lleva gastaos 400.000 millones d’euros en rescatar a la banca privada y nos paraísos fiscales hai depositaos 6 BILLONES d’euros.

Pa la CSI, llegó l’intre de que les y los trabayadores dexemos de confiar en quien, hasta agora, dirixieron la política y la economía, porque los sos beneficios son la nuesa ruina.

Les coses namá van camudar cuando los y les trabayadores entamemos un camín de movilización y de defensa de los nuesos derechos, pa ganar na cai lo que nos roben nos despachos. La CSI va faer tolo posible por qu’esta manifestación sía’l primer pasu.