Llibru compilatoriu de testos de Luis Redondo, “Relatos d’un nómada”. Ya a la venta

El llibru “Relatos d’un nómada”, de Luis Redondo Álvarez (Redondo), ye una escoyeta de los testos que mientres años escribió. Nellos la so ideoloxía, la so visión de la vida, la so forma d’enfrentar el mundu, los sos pruyimientos, tán presentes al traviés de los distintos personaxes. Lo ficticiu y lo real danse la mano y entemécense pa danos a conocer y esplicanos unes vides, unos tiempos y unes lluches nada convencionales.

El títulu del llibru yera lo que meyor definía esta escoyeta, ya que Redondo definíase como un nómada: persona que tuvo que dir de despidu en despidu, de trabayu en trabayu de resultes de la so llucha llaboral y político, siendo la mayoría comunistes. A Redondo nunca-y llego l’amnistía llaboral.

Al traviés los sos testos podemos averanos y conocer un pocu de la hestoria d’aquellos homes qu’aguantaron na Celda caliente (la celda pegada a la panadería) de la cárcel del Cotu hasta que los mataron por lluchar poles sos idees. O podemos averanos a la vida nel barriu del Natahoyo y al espertar a l’adolescencia d’unu de los sos munchos habitantes. O conocer por qué parte de CCOO ruempe con esi sindicatu y funda La Corriente Sindical d’Esquierda.

Anque la portada y la parte de “A mou de biografía” tán n’asturianu, el restu del llibru ta talo como lo escribió Redondo, ye dicir en castellán con palabres amestadas n’asturianu.

Sirva esta pequena escoyeta p’ayudar a recorda-y.

En curtiu vamos faer una presentación na que vamos proxectar un videu-entrevista a Redondo.