Concentración escontra los asesinatos de sindicalistes en Nestlé-Colombia

CSI-Internacionalistes

Dende la Corriente Sindical d’Izquierda, queremos esixir públicamente al Gobiernu colombianu que ponga frenu a la impunidá de los asesinatos a sindicalistes nel so país, de manera especial de sindicalistes de la multinacional Nestlé afiliaos a SINALTRAINAL-CUT.

Consideramos bien grave l’asesinatu de OSCAR LOPEZ TRIVIÑO asocedíu’l sábadu pasáu en Bugalagrande-Valle del Cauca, antecedíu de graves amenaces de muerte de los grupos paramilitares conocíos como “Los Urabeños” y “Los Rastroxos” que siguen interviniendo, cola so violencia impune, nel conflictu obreru-patronal de Nestlé-Colombia colos y coles sos trabayadores.

L’asesinatu d’OSCAR LOPEZ TRIVIÑO améstase al de LUCIANO ROMERO MOLINA, tamién obreru de Nestlé y sindicalista de SINALTRAINAL-CUT, quien tuvo acoyíu nel 2004 pol Programa Asturianu d’Atención a Víctimes de la Violencia en Colombia y foi asesináu’l 11 de setiembre del 2005 en Valledupar pol grupu paramilitar de nomatu Jorge 40, n’alianza criminal con axentes de la policía secreta DAS, como se comprobó nel xuiciu penal.

La CSI quier espresar el so refugu al crime d’OSCAR LOPEZ y al xenocidiu sindical que sigue cometiéndose a la escontra los sindicalistes colombianos y colombianes, magar los anuncios del so Gobiernu en relación cola proteición d’esti seutor especialmente vulnerable.

Pa terminar, esiximos que s’investigue l’asesinatu d’OSCAR LOPEZ TRIVIÑO y se castígue a los responsables y, asina mesmu, desiximos protección efectiva a los sindicalistes y la desarticulación de los grupos narcu-paramilitares que siguen operando en momentos y árees d’interés de les empreses multinacionales.