Manifiestu de la CSI énte’l ¿accidente? mineru en Pola de Gordón

Convocaes 48 hores de fuelga en tola minería y concentración énte l’Ayuntamientu de Pola de Gordón, a les 12:00 h. del martes 29 d’ochobre.

Esti llunes, 28 d’ochobre de 2013, morríen 6 mineros nel Pozu Emilio de La Llombera, en Pola de Gordón. Mientres escribimos estes llínees, otru mineru debátese ente la vida y la muerte y otros 4 permanecen hospitalizaos, anque la so vida paez nun tar en pelligru.

Dende la CSI, unviamos la nuesa solidaridá y el nuesu sofitu incondicional a les families y seres queríos de toos ellos.

Na CSI creemos bonalmente que cuando una trabayadora o un trabayador muerre nel trabayu porque nun se realicen les inversiones necesaries en prevención y seguridá, eso ye un crime y quienes lu provoquen y quien lu consienten, son criminales.

Va tiempu que lo veníamos diciendo: los retayos na minería, non solamente afecten a la producción, sinón a les inversiones en prevención y seguridá. Yera un secretu a voces. La precariedá de les condiciones de trabayu, l’abandonu les instalaciones, la falta d’inversiones y amenorgar de les condiciones de seguridá, afilaben una gadaña que, tarde o aína, acabaría segando dalguna vida.

¡Esto ye’l capitalismu, señores y señores!. Empresarios como estos nun vienen sólamente a sacar beneficios a cuenta la nuesa miseria; los sos beneficios tán percima, inclusive, de la mesma vida de cualisquier obreru o obrera.

El Ministru Soria, que va dalgún tiempu llamó privilexaos a los trabayadores de la mina, allegó a Llión y, demientres con una man se solidariza coles families afectaes, cola otra sigui retayando les inversiones en seguridá y afirmando la correcta inspección de les instalaciones mineres. La hipocresía acaba per tornase n’infamia.

Vamos repitir otra vegada lo que yá diximos (a ver si daquién dase por aludíu): quien provoquen o consienten esta situación, nun tienen otru calificativu qu’el de criminales.

Los trabayadores de la minería tienen una dura cuestión que resolver. La necesidá imperiosa de caltener el so puestu de trabayu tien de dexar tamién sitiu a la necesidá, entá más imperiosa, de nun perder la vida nel trabayu. Y en esta cuestión, el sofitu y la solidaridá de tola clase obrera xuega un papel imprescindible y decisivu.

Pa los trabayadores muertos y les sos families, nun atopamos pallabres que dicir. Pal restu de trabayadores mineros, namá estes: llucha, unión y firmeza.