Rempuesta de la CSI al comité d’empresa de Felguera Construcciones Mecániques (Taller de Barros de Duro-Felguera)

REMPUESTA DE LA CSI AL COMITÉ D’EMPRESA DE FELGUERA CONSTRUCCIONES MECÁNIQUES (TALLER DE BARROS DE DURO-FELGUERA)

La Corriente Sindical d’Izquierda quier retrucar al comunicáu fechu públicu, conxuntamente, pol Comité d’Empresa de Felguera Construcciones Mecániques (Taller de Barros de Duruo-Felguera) y los sindicatos representaos, CCOO y UXT, nel que se condergaben “los actos vandálicos cometíos nun autobús na estación d’autobuses de Llangréu’l pasáu día 15, lo mesmo que de la quema de neumáticos en delles instalaciones de talleres y oficines de Duro Felguera”.

Too paecería indicar qu’esti comunicáu podría ser frutu de la medrana del Comité d’Empresa y de los sindicatos representaos, CCOO y UXT, a ser acusaos de ser, ellos mesmos, los axentes actores de los incidentes mentaos, con tolo qu’ello apareyaríe.

Sicasí, na CSI camentamos que nada tienen que tarrecer, cuidao que ye públicu y vultable que tanto’l Comité de Barros como los sindicatos representaos, CCOO y UXT, non solamente son inocentes de realizar tales actos, sinón que son totalmente incapaces de faer absolutamente nada que nun tea planiáu primeramente pola Direición de la Empresa y apautáu, darréu con ellos mesmos.

Al so comunicáu tornamos (lliteralmente): “nun hai, a día de güei, dengún anunciu, nin entamu de movilizaciones per parte del comité d’empresa, a la espera de que la dirección reconduza la so decisión…”.

Y esto sí que ye, a lo menos, sorprendente. Énte una decisión de la empresa de pesllar los talleres de Felguera Melt y Felguera Construcciones Mecániques o ante la cascada despidos que tán produciéndose na empresa dende va dellos años, los “representantes” de los y les trabayadores deciden nun faer absolutamente nada. ¡Hasta’l más novatu bufete d’abogaos llaboralistes, acabante salir de la Facultá Derechu, encamentaría etamar a tomar midíes!

Ye sorprendente, tamién, que’l Comité d’Empresa de Folles escaecer de que los sindicatos representaos, CCOO y UXT, convocaron una manifestación, dende Sama a La Felguera, polos mesmos oxetivos que, enantes, facer la CSI, dende La Felguera hasta Sama. Nesi sentíu, preguntamos: ¿hai o nun hai movilizaciones convocaes polos sindicatos representaos, CCOO y UXT?, ¿en qué quedamos?.

Si volvemos al comunicáu fechu públicu pol Comité d’Empresa de Barros y los sindicatos representaos, CCOO y UXT, dizse (lliteralmente): “siendo conocedores de dichos actos vandálicos por grupos incontrolaos, dende’l Comité de Felguera Construcciones Mecániques y la so asamblea, apelen a la responsabilidá por qu’asemeyaos actos nun tornen asoceder”.

No que fai a esto, na CSI, conscientes de la inutilidá’l Comité d’Empresa y de los sindicatos representaos, CCOO y UXT (qu’escaécense hasta de les manifestaciones qu’ellos mesmos convoquen), duldamos del control que puedan exercer sobre’l conxuntu la plantía llaboral y entrugamos si podríe ser posible qu’esos “grupos incontrolaos” podríen responder, más bien, al descontentu y la desesperación de munchos trabayadores que, abandonaos polos sos sindicatos y comités, vense embocaos al paru de forma irremediable, al marxe la so afiliación sindical.

Dende la CSI, encamentamos muncha prudencia al Comité d’Empresa de Barros y a los sindicatos representaos, CCOO y UXT, porque entámase denunciando “actos vandálicos” y acábase entregando en Comisaría a trabayadores que, tengan una afiliación sindical o otra, namás lluchen por llevar el pan pa la so casa.

Dixebradamente d’estes cuestiones menores, la CSI camienta que’l problema cimeru de Duro-Felguera anicia n’otra realidá que cada vegada ye más incuestionable: los Comités d’Empresa y los sindicatos representaos, tán axustando cola empresa los zarros de tolos talleres, tán vendiendo la práutica totalidá los emplegos y namás queda por axustar el preciu que se-y pon a cada puestu trabayu. Dende la CSI atrevémonos a entrugar: ¿va quedase dalgún representante sindical ensin “iguar lo de so”?. Nel Taller de Barros yá se sabe la rempuesta: 32 que sí y 19 que non.

Pero, too esto nun ye nuevo; la hestoria ta ende, pa quien quiera vela. Primero qu’esistiera la CSI, Ios sindicatos representaos, CCOO y UXT, escaecieron los sos raigaños obreros y, cuando “grupos incontrolaos” faíen barricaes pa defender el so trabayu y la so forma de ganase la vida, les direiciones d’esos sindicatos yá espublizaben les mesmes notes de prensa, yá condergaben los mesmos “actos vandálicos” y yá dexaben a les y los trabayadores abandonaos a la so suerte.

Yá entós, les direcciones sindicales de CCOO y UXT camudaron el tayu pola subvención, l’asamblea pol teléfonu móvil y la barricada pol despachu. Esa ye la cruda realidá y, demientres sigamos dándo-y cuerda a esi sindicalismu, nun vamos tener más que vergoña y miseria.

Dende la CSI afalamos a los trabayadores de CCOO y UXT en Duro-Felguera, a tomar cartes nesti asuntu. Afalámosvos a remontavos a lña escontra les vueses direiciones y a la escontra los vuesos “representantes”. Sabemos que sois clas obrera (anque se vos escaeciere), sabemos que nun queréis vender el vuesu puestu trabayu, sabemos que nun queréis vender el futuru de los vuesos fíos y fíes. Pos, eso: ¡nun lo faigáis!.

¡GÜEI, AYERI, MAÑANA Y SIEMPRES: DURO-FELGUERA, RESISTENCIA OBRERA!