Manifestación escontra’l pieslle de Tenneco (Monroe) Asturies

ENTAMA: ASAMBLEA DE TRABAYADORES DE TENNECO.

Va unes selmanes, Asturies recibía un nuevu mazazu cola anuncia’l pieslle la planta Tenneco (Monroe), en Xixón. Otres 230 families que se ven empuestes al paru.

La riestra empreses pesllaes, dende va unos años, ye interminable: Diasa Pharma, Venturo XXI, Alas Aluminium, Sodes, Crady, Rioglass, Ceyd, Contratas Iglesias, Asturiana d’Asfaltos, Chupa-Chups, La Voz d’Asturies, Bittia Media, Suzuki, Alacena, Talleres de Duro-Felguera, mines y pozos, subcontrates mineres…

Dellos datos ponen de relieve que, nos caberos cinco años, podríen habese pesllao unes 4.000 empreses n’Asturies, munches d’elles, dempués d’esbardiar importantes subvenciones públiques.

Asina, lleguemos a la situación d’anguañu: más de 100.000 persones en paru, ente 35.000 y 40.000 families asturianes con tolos sos miembros en paru; ente un terciu y la metada los y les pensionistes cobren menos de 600 euros, el 60% la mocedá ta ensin emplegu y la probitú entama afectar a un porcentaxe cada vegada más grande de la población.

Asturies nun puede permitise nin un paráu nin una parada nin un zarru d’empresa más. Pero, los y les trabayadores tamién sabemos que nun podemos cuntar con otra fuerza que nun sía la nuesa propia capacidá d’organización y movilización.

Por ello, tenemos de caltener la xunidá de l’Asamblea Trabayadores y defendela como únicu preséu p’algamar decisiones. D’esta miente, vamos torgar inxerencies polítiques y sindicales interesaes, que namás nos empobinen a salíes individuales y a la vienta los puestos de trabayu, hipotecando’l futuru de los nuesos fíos y fíes y sometiéndolos a condiciones esclavistes (ensin Seguridá Social, ensin educación nin pensiones, con salarios de miseria…), impuestes polos patronos.

Nesti camín, tenemos la obligación de lluchar y resistir con toles consecuencies, implicando nello a la sociedá asturiana. Trátase d’amestar lluches y enfotos pa ganar na cai lo que nos roben nos despachos.