Llamáu de la CSI a participar na manifestación escontra’l pieslle de Tenneco (Monroe) Asturies

(Los y les trabayadores de Tenneco-Ermua/Euskal Herria, convoquen un día de fuelga, el mesmu día 17, en solidaridá con Asturies).

CONVOCA: ASAMBLEA TRABAYADORES DE TENNECO.

La Corriente Sindical d’Izquierda fai un llamáu a tola clase obrera asturiana a participar activamente na manifestación a la escontra’l zarru la planta de Tenneco, convocada pola Asamblea Trabayadores.

Nin el Gobiernu nin el Parllamentu nin l’Ayuntamientu son, nestos intres, garantía denguna pa la continuidá de la empresa y de los puestos de trabayu. La realidá ye que los y les trabayadores nun tenemos nin una sola institución que nos defenda.

Asturies nun puede permitise nin un paráu nin una parada nin un pieslle d’empresa más. Pero, los y les trabayadores tamién sabemos que nun podemos cuntar con otra fuerza que nun sía la nuesa propia capacidá d’organización y movilización.

Nesi sen, y dende’l primer momentu, la Seición Sindical de la CSI en Tenneco, impulsó y afalagó la constitución de l’Asamblea Trabayadores como únicu organismu válidu de decisión, movilización y negociación, talo y como ta siendo.

Na CSI, aplaudimos y afalagamos esta forma d’organización de les y los trabayadores y defendemos firmemente la xunidá d’esta Asamblea, como la meyor ferramienta de llucha y movilización.

Sofitamos unánimemente la decisión de l’Asamblea de refugar cualquier tipu de “incentivu” o indemnización en cuenta de los puestos de trabayu y afitamos como únicu oxetivu la continuidá de la planta y de la totalidá de los puestos de trabayu, que nunca vamos poner en vienta.

Nesta llucha, camentamos que’l papel de los sindicatos, entamando pola mesma CSI, ye nidiu: sofitar y reforzar con tolos preseos al nuesu algame, les xestiones, aiciones y movilizaciones decidíes pola Asamblea Trabayadores de Tenneco.

Pa finar, dende la CSI queremos faer una reconocencia a la solidaridá demosada polos y poles trabayadores de la planta de Tenneco n’Ermua (Euskal Herria), que convocaron un día de fuelga pal próximu xueves 17 d’ochobre y van desplazase n’autobuses hasta Asturies pa sofitar, cola so presencia, les reivindicaciones de los sos compañeros y compañeres n’Asturies.

Ensin dubia, esti ye’l camín. ¡P’alantre, compañeros y compañeres!.

¡PUXA L’ASAMBLEA TRABAYADORES DE TENNECO!

¡PUXA LA LLUCHA OBRERA!. ¡PUXA ASTURIES!.