Concentración pol xuicíu de Iván, trabayaor despedíu de Duro Felguera

Güei, miércoles 2 de setiembre, tuvo llugar en Mieres, el xuiciu pol despidu d’Iván Tomás, responsable de la Seición Sindical de CSI nel Taller de Barros de Duro-Felguera.

Unes 400 persones fueron amosando’l so sofitu demientres les casi 4 hores que duró la concentración convocada. Díes atrás, Iván Tomás refugaba, una tres otra, les xeneroses ufiertes de la empresa pa qu’aportara a idemnizaciones millonaries en cuenta del so puestu trabayu.

Tantu a la entrada como a la salida’l xuiciu, fixéronse patentes los glayíos d’ánimu y solidaridá pa con Iván, al tiempu que los abogaos de la empresa (un bufete contratáu especialmente pa esti casu), acompañaos de guardaespaldes, recibíen un fuerte abucheu y glayíos de “arrastraos” y “vendeobreros”, teniendo que ser protexíos polos axentes de la Policía Nacional.

Dende la CSI, anunciamos que, sía como quier la sentencia nesti xuiciu, vamos siguir alantre na llucha a la escontra los despidos y los zarros d’empresa, a la escontra l’esmantelamientu de Les Cuenques y d’Asturies y por que nun haya nin un paráu nin una parada más.

¡CON LLUCHA HAI FUTURU!. ¡PUXA LA LLUCHA OBRERA!. ¡PUXA ASTURIES!.