Movilizaciones escontra los despidos y pieslles de talleres en Duro Felguera

¡ASTURIES EN PIE!

A LA ESCONTRA L’ESMANTELAMIENTU DE LES CUENQUES Y D’ASTURIES.

¡NIN UN PARÁU NIN UNA PARADA NIN UN PIESLLE D’EMPRESA MÁS!.

1-ACAMPADA de los trabayadores despedíos de Duro-Felguera: dende’l vienres 20 hasta’l vienres 27 setiembre. Nel Parque Vieyu de La Felguera.

2-CONCENTRACIÓN de sofitu y presentación de les movilizaciones: vienres 20 setiembre, a les 19:30 h, nel Parque Vieyu de La Felguera.

3-CONCENTRACIÓN de sofitu: tolos díes, dende’l 20 al 27 setiembre, a les 19:30 h., nel Parque Vieyu de La Felguera.

4-MANIFESTACIÓN: sábadu 28 setiembre, a les 19:00 h. Dende’l Parque Vieyu de La Felguera hasta l’Ayuntamientu de Llangréu, en Sama.

ENTAMEN: CSI, CXT, SUATEA, CENTRU SOCIAL LA SEMIENTE, FUSOA, COLEUTIVU DE PARA@S Y PRECARI@S D’ASTURIES, ASOCIACIÓN PICU RABICU, CENTRU SOCIAL SESTAFERIA, ASOCIACIÓN ALAMBIQUE.

El responsable de la Seición Sindical de la Corriente Sindical d’Izquierda en Felguera Construcciones Mecániques (Taller de Barros) de la empresa Duro-Felguera, foi despidíu’l pasáu 10 de mayu de 2013. Va unes selmanes, nel mesmu taller, foi despidíu otru militante de la CSI y la direición de la empresa yá anunció’l zarru de la planta de Felguera Melt.

Amás d’ello, el pieslle progresivu de la minería y l’esmantelamientu industrial y económico de Les Cuenques ye una realidá que se ceba diariamente en miles de paraos y paraes.

Pero esto nun ye nuevu. N’Asturies, tolos díes, almorzamos con un nuevu zarru d’empresa. La llista d’empreses pesllaes, dende va unos años, faise interminable: Diasa Pharma, Venturo XXI, Nales Aluminium, Sodes, Crady, Rioglass, Ceyd, Contratas Iglesias, Asturiana d’Asfaltos, Chupa Chups, La Voz d’Asturies, Bittia Media, Suzuki, Alacena, Talleres de Duro-Felguera, Tenneco, mines y pozos, subcontrates mineres…

Dellos datos ponen de relieve que, nos caberos cinco años, podríen haber cerraose unes 4.000 empreses n’Asturies, munches d’elles, dempués d’esbardiar importantes subvenciones públiques.

Asina, lleguemos a la situación actual: más de 100.000 persones en paru, ente 35.000 y 40.000 families asturianes con tolos sos miembros en paru; ente un terciu y la metada los y les pensionistes cobren menos de 600 euros, el 60% la mocedá ta ensin empléu y la probitú entama afectar a un porcentaxe cada vegada más grande de la población.

Mentantu, el Gobiernu asturianu y los partíos parllamentarios d’Asturies, miren escontra otru llau o pasen de puntilles sobre cada zarru d’empresa: bones palabres, delles promeses y un inútil “vamos faer cuantu podamos”, ye cuantu puede esperase d’ellos. Esti Gobiernu y esti Parllamentu nun fueron capaces de torgar el zarru d’una sola empresa n’Asturies. La realidá ye que les y los trabayadores nun tenemos nin una sola institución que nos defenda.

Asturies nun puede permitise nin un paráu nin una parada nin un zarru d’empresa más. Pero, los y les trabayadores tamién sabemos que nun podemos cuntar con otra fuerza que nun sía la nuesa propiaa capacidá d’organización y movilización.

Xunir los sectores y empreses en cris o en conflictu ye una prioridá, incorporando, nesa engarradiella, al sector más perxudicáu de toos: les persones en paru o con trabayos precarios. Trátase de sumar lluches y voluntaes pa ganar na cai lo que nos roben nos despachos.