La emerxencia nun pue esperar. Vivir dignamente ye un derechu

Convoca: Asociación escontra la esclusión ALAMBIQUE

Ante’l próximu alderique nel Plenu del Conceyu de Xixón sobre la asignación de recursos pa la Fundación Municipal de Servicios sociales (Fabricar de Miseria ensin solución), dende l’Asociación contra la esclusión ALAMBIQUE queremos faer delles aclaraciones.

Ente’l 18 de xunu y el 17 de xunetu, arriendes de la situación d’un vecín ensin recursos, denunciábamos toles mañanes la respuesta insuficiente de la Fundación Municipal de Servicios Sociales (FMSS) ante la realidá de munches persones d’esta ciudá.

Poníamos n’evidencia la nula voluntá política de la conseyería de Bienestar Social, responsable del atascu crónicu del Salariu Social (más de 20 meses); lo mesmo que de la Fundación Municipal, que foi incapaz de modificar el reglamentu por que la Ayuda d’Emerxencia Social pueda prorrogase de forma indefinida, declarándose al llinde de la so capacidá..

Señalábamos a les responsables autonómica (Esther Díaz, PSOE) y municipal (Eva Illán, Foro Asturies), denunciando la falta de voluntá política p’asegurar a toles persones unos mínimos pa poder (sobre)vivir con dignidá.

Señalábamos tamién los munchos silencios que dexen esta situación, empezando polos del restu de parllamentarios (autonómicos y municipales) que paecen tener otres prioridaes primero que les persones.

Nes últimes selmanes, la prensa recoyía cómo naide asume la responsabilidá de la situación d’atascu del Salariu Social y la insuficiencia de les ayudes municipales.

Nel plenu del 13 de Setiembre, nesti Conceyu, ente otres coses, alderícase un aumentu de la partida p’Ayudes d’Emerxencia. Esti discutiniu nun va sirvir pa garantizar d’una vegada por toes que la FMSS (Fábrica de Miseria Ensin Solución) dexe de ser parte del problema. Reflexa más bien el xuegu partidista de pasase la pataca ente ellos, de forma comenenciosa.

Dende l’Asociación contra la Esclusión Alambique siguimos denunciando la falta de voluntá política pa garantizar unes condiciones de vida dignes pa toles persones. Denunciamos tamién el secuestru de la participación política, negándonos el nuesu derechu a opinar y decidir sobre les prioridaes de gastu municipal.

Siguimos reclamando:

-El cambéu na reglamentación municipal de les Ayudes d’Emerxencia, por que puedan cobrase de forma indefinida mientres se caltenga la situación de falta

-La prioridá nel presupuestu municipal en garantizar estos mínimos a les persones que vivimos en Xixón

-Una actitú d’esixencia activa escontra la Conseyería de Bienestar Social por que se resuelvan de forma urxente toles solicitúes pindies del Salariu Social Básicu.

¡Queremos xusticia social y non caridá!

Vivir dignamente ye un derechu