Nin una persona parada más n’Asturies

Va unos díes, Asturies recibía un nuevu mazazu col anunciu del pieslle de la planta de Tenneco Automotiv, en Xixón. Otres 250 families que se ven abocaes al paru.

Pero esto nun ye nuevu. La llista d’empreses zarraes, dende va unos años, faise interminable: Diasa Pharma, Venturo XXI, Alas Aluminium, Sodes, Crady, Rioglass, Ceyd, Contratas Iglesias, Asturiana d’Asfaltos, Chupa Chups, La Voz d’Asturies, Bittia Media, Suzuki, Alacena, Talleres de Duro-Felguera, mines y pozos, subcontrates mineres…

Dellos datos ponen de relieve que, nos caberos cinco años, el porcentaxe de quiebra en compañíes de menos de 20 trabayadores foi del 10% de les esistentes, mientres qu’aquelles que tienen una plantiya superior pesllaron nun porcentaxe perriba’l 21%. Nestos postreros 5 años podríen haber pesllao unes 4.000 empreses n’Asturies, munches d’elles, dempués d’esbardiar importantes subvenciones públiques.

Asina, lleguemos a la situación d’anguañu. Más de 100.000 persones en paru, el 40% yá nun cobra nada y otru 30% cobra menos de 600 euros, ente 35.000 y 40.000 families asturianes, tienen a tolos sos miembros en paru; ente un terciu y la metáda los y les pensionistes cobren menos de 600 euros, el 60% la mocedá ta nel paru y la probeza empieza a afectar a un porcentaxe cada vegada más grande de la población.

Mentanto, el Gobiernu asturianu y los partíos parllamentarios d’Asturies, miren escontra otru llau o pasen de puntilles sobre cada zarru d’empresa. Desfáense en bones pallabres y promeses a les y los trabayadores despidíos, faen la semeya de prensa y un inútil “vamos faer cuanto podamos”, ye cuanto puede esperase d’ellos.

Esti Gobiernu y esti Parlamentu nun fueron capaces de torgar el zarru d’una sola empresa n’Asturies. La realidá ye que les y los trabayadores nun tenemos nin una sola institución que nos defenda.
Ta claru qu’Asturies nun puede permitise nin un paráu nin una parada nin un zarru d’empresa más. Pero, les y los trabayadores tamién sabemos que nun podemos cuntar con otra fuerza que nun sía la nuesa mesma capacidá d’organización y movilización.

Siguir defendiendo cada sector o empresa por separáu nun va torgar la sangría de zarros y despidos. Xunir los sectores y empreses en crisis o en conflictu ye, agora más que nunca, una prioridá, incorporando, nesa engarradiella, al sector más perxudicáu de toos: les persones en paru o con trabayos precarios

Nos próximos meses van dase lluches y conflictos importantes n’Asturies. Los sindicatos de clas asturianos, empezando pola CSI, tenemos de tornanos nuna ferramienta d’unión ente tolos y toles trabayadores en conflictu, poniendo en contactu les distintes lluches, promoviendo movilizaciones conxuntes y faciendo un frente común colos paraos y paraes y los sectores más aprobetaos de la población.

Ye necesariu asumir y sofitar que cualquier persona, de cualquier sector llaboral, parada o non, tien d’amestase a cualquier conflictu de cualquier sector. Trátase de sumar lluches y voluntaes pa ganar na cai lo que nos roben nos despachos.