Comunicáu de la CSI nel día de la Nación asturiana

La CSI yá sopelexó que’l nuesu sindicatu sofita les reivindicaciones de soberanía y de poder de decisión pal Pueblu Asturianu, que tan asoleyándose nesta manifestación. Y tamién dexamos bien afitao que la soberanía d’Asturies tien d’encuadrase na llucha de la clas obrera a la escontra’l capitalismu. Pero nin la soberanía nin el progresu de la clas obrera van caenos llovíes del cielu.

Los partíos políticos de la Xunta Xeneral y la mayoría los partíos del Parllamentu español nun ficieron otra cosa qu’espoliar Asturies y tornala nuna especie de colonia de la qu’estraer recursos naturales, enerxía eléctrica, mano d’obra barata o, simplemente, el dineru fácil d’una corrupción cada vez más escandalosa. Mientres tantu, les asturianes y asturianos quedamos condenaes y condenaos al paru, la miseria o la emigración.

Pela so parte, les direiciones de los sindicatos mayoritarios, CCOO y UXT, acabaron por tornase nuna pieza más d’esta maquinaria. Les y los trabayadores d’Asturies nun tenemos nin una sola institución que nos defienda. La clas obrera asturiana nun puede seguir delegando el so futuru nestos xestores del mesmu sistema capitalista que nos ta espoliando.

Ente unos y otros tan fundiendo Asturies. La gran mayoría de los y les trabayadores d’Asturies yá nun trabaya naquelles grandes empreses o seutores productivos. La gran mayoría de la clas obrera asturiana nin siquiera trabaya o failo en trabayos precarios que yá nun dan pa comer. La gran mayoría de la clas obrera asturiana ta abocada a la miseria. Esa ye la realidá.

La minería, la Sanidá, la Educación, los Servicios Sociales, Duro-Felguera, Caxastur, Tenneco…. Asturies ta en quiebra y too se ta viniendo abaxo. El capitalismu vien a por too Asturies, la so ofensiva ye total y, por ello, la respuesta de la clas obrera asturiana tamién tien de ser total. Nel puntu nel que tamos, naide va sobrevivir aislladamente: o nos salvamos toes y toos xuntos o toes y toos vamos arder na mesma foguera.

Los sindicatos de clase asturianos, la Izquierda Sindical d’Asturies, entamando pola CSI, nun podemos permitir que miles y miles de persones en paru tengan que comer de lo qu’alcuentren na basura., que la xente muerra a les puertes de los hospitales en los que namás s’atienda a quien tenga dineru pa pagalo, nun podemos permitir que sólo los ricos tengan accesu a los estudios o que les persones con necesidá d’atención social acaben tiraes peles cais. Nun podemos permitilo mientres banqueros, grandes empresarios y especuladores amasen fortunes y nos traten comu si fuéremos mercancía d’usar y tirar.

Pero, anguañu, pedir coses tan básiques como un trabayu dignu, un hospital onde curase, una casa onde vivir o una escuela onde estudiar, págase con represión, multes, golpes, xuicios y cárcel. Asina de criminal ye’l sistema capitalista y asina de criminales son los gobiernos que lu faen posible.

Nesti sen, dende la CSI pedimos a tolos sindicatos, a todos, que, bien conxuntamente o por separtáu, apurramos tolos nuestros recursos materiales, económicos y humanos p’apoyar a cualquier trabayadora o trabayador represaliáu, deteníu o enxuiciáu pol simple fechu de lluchar pa llevar un sueldu dignu a casa.

Nos prósimos meses van dase lluches importantes n’Asturies contra los cierres y los despidos en munches empreses como Duro-Felguera, Sanvicente, Caxastur, Cébrano, Salvamento de Playas o contra l’ultimu mazazu de Tenneco. Toes y toos tenemos de sumanos a estes lluches tornando cada puestu de trabayu nuna trinchera. La clas obrera asturiana tenemos de remanganos y ponenos al llabor porque nun nos queda otra que ganar na cai lo que nos tan robando nos despachos.

Y, nesti camín, podemos perder dalguna batalla, pero la pallabra “rendición” nun ta nel nuesu dicionariu. La hestoria d’Asturies escribióse y va seguir escribiéndose con otres pallabres: firmeza, determín, solidaridá y llucha obrera.

¡P’ALANTRE, COMPAÑERES Y COMPAÑEROS!, ¡SIEMPRE P’ALANTRE!.¡PUXA LA LLUCHA OBRERA!. ¡PUXA ASTURIES LLIBRE Y SOCIALISTA!.