1os. Alcuentros alternativos y populares en Biemenes

Derechos vitales como l’alimentación, la sanidá, la vivienda, el trabayu, la educación, decidir sobre’l propiu cuerpu o los servicios sociales, tan desapaeciendo peles alcantarielles de la banca, l’avaricia empresarial, l’espilfarru y la corrupción.

Na nuesa hestoria, hubo quien s’echó al monte pa defender la llibertá y los derechos de la clase obrera. Pagáronlo cola so vida y, por eso, vamos facer un homenaxe a Los Fugaos y los ideales polos que llucharon.

Tamién vamos falar de la última fuelga minera, porque enseñonos a ponenos en pie. Pero tamién deprendimos que ningún sector va salir alantre por sí solo. O lluchamos toes y toos en comuña o toes y toos vamos arder na mesma foguera.

El capitalismu vien a por too. La so ofensiva ye total y, por ello, la respuesta de la clase obrera tamién tien de ser total. Nesi enfrentamientu, ye prioritaria la solidaridá pa con toles persones represaliaes pola so participación nes lluches d’estos últimos años.

Agora, tenemos d’atopar la nuesa propia forma d’organizanos, de xuninos y de construyir el futuru. La resistencia, la movilización y la solidaridá son armes antigües, pero ensin elles va facésenos imposible ponenos en pie.