El personal socorrista de Ribasella xúnese nes sos denuncies al de Llanes

Lo mesmo qu’en Llanes, el personal socorrista de Ribesella denunció, ante Inspeición de Trabayu, a la empresa que s’encarga de los llabores de salvamentu y socorrismu nes sableres del conceyu, nesti casu, Xestión de Servicios Sociosanitarios del Principáu d’Asturies (GESPRIN S.L.)

Les denuncies tienen como motivu l’incumplimientu de los descansos obligatorios, ensin compensación económica o en forma de díes posteriores de descansu, la superación de les 40 hores selmanales ensin compensación económica o de descansu, l’impagu de pluses pol trabayu desempeñáu en domingos y festivos y l’incumplimientu, en delles ocasiones, del descansu obligatoriu de 12 hores ente dos xornaes consecutives, tamién ensin compensación económica o de descansu posterior.

Amás d’ello, denúnciase que los recursos humanos y materiales resulten insuficientes ya incumplen les condiciones del serviciu afitaes pol Conceyu de Ribesella, siendo en dellos casos illegal:

D’esta manera, la plantía, que tendría de cuntar con 17 socorristes a tiempu completu, cuenta namá con 15 persones cola formación afayaíza pa desempeñar tala función nel Principáu d’Asturies y nel Pliegu de Condiciones pa la concesión del serviciu. Asina, cada serviciu nes sableres de Santa Marina y Vega vien realizándose con un socorrista menos de los indicaos nel Pliegu de Condiciones de la concesión del Conceyu de Ribesella.

Coles mesmes, los lancheros contrataos pola empresa son marineros profesionales, pero escarecen de la formación básica en salvamentu y socorrismu acuáticu y requeríos nel Pliegu, magar lo que trabayen inclusive na sablera uniformaos como’l restu socorristes, poniendo en peligru la integridá de les presones usuaries y a ellos mesmos.

La embarcación neumática llixera apurrida pola empresa, retulada como de salvamentu y que ye utilizada regularmente pa esi fin, pertenez a la categoría septima, que según el RD 1027/89 de 28 de Julio sobre abanderamientu de buques y rexistru marítimu, correspuende a “usu esclusivu pa la práutica’l deporte ensin propósitu codalosu o la pesca non profesional”. Esta embarcación permanez atracada al pie de la semiríxida apurrida pol 112 Asturies.

Na tema de contratación, a día de güei, dengún de los 15 integrantes de la plantía recibió copia roblada del so contratu, nin información detallada de les condiciones del mesmu. Tampoco s’apurren nomar desglosadas a final de mes, nun recibiendo entá les de Xunu y Xunetu. Por ello, y en base a lo asocedío na temporada de 2012, los socorristes tarrecen que les sos nómines tean siendo manipoliaes pola empresa, de tala forma que parte’l so salariu base apautáu verbalmente, y que ye de 930 € netos, sía camufláu como complementos non salariales y parte proporcional de les pagues extras, nun intentu d’estafar, coles mesmes, tantu a la Seguridá Social como al propiu trabayador.

Dalgunos de los contratos realizaos a entítulu de socorrista suponen una simulación relativa, pos dellos de los trabayadores tán contrataos realizando funciones de conductores d’ambulancia y técnicos sanitarios.

Pa terminar, el coordinador del Serviciu nun cumple o s’extralimita nes sos funciones, al ausentase de forma siguida y permanente de los centros de trabayu, ordenando a los socorristes por que sían estos quien desempeñen bona parte de les funciones que’l Pliegu de Condiciones Técniques atribúi puramente a la figura del coordinador.