Seguimientu mayoritariu de la plantía de Cébrano nel tercer día de fuelga

Nel tercer día de fuelga, la plantÍA de la empresa CÉBRANO secundó mayoritariamente’l paru llaboral. NamáS cuatro trabayadores (más otres dos, obligaes polos servicios mínimos) entraron güei a trabayar.

La empresa Cébrano volvió frayar la normativa llegal en materia de fuelga, contratando’l tresporte a empreses esternes y utilizando personal voluntariu pa sustituyir a los y les trabayadores en fuelga. La normativa llaboral en materia de fuelga prohibe tayantemente la sustitución de les y los trabayadores en fuelga por personal ayenu a la empresa.

El Comité de Fuelga yá presentó una denuncia ante Inspección de Trabayu por estes mesmes causes, pero la empresa sigue frayando la llegalidá, polo que dichu Comité de Fuelga va presentar una nueva denuncia énte l’autoridá llaboral escontra la empresa Cébrano, escontra les empreses de tresporte esternes y contra les persones voluntaries que tán sustituyendo illegalmente a les y los trabayadores en fuelga.

Los y les trabayadores de Cébrano concentráronse güei ante la Conseyería de Bienestar Social pa pidir soluciones a la so precaria situación llaboral y el Comité de Fuelga caltuvo güei una xunta col Grupu Parlamentariu d’Izquierda Xunida na Xunta Xeneral y va caltener otra xunta, mañana xueves, col grupu municipal del PSOE nel Conceyu de Siero, coles mires de llevar les sos reivindicaciones hasta la Conseyera de Bienestar Social y el Parlamentu Asturianu.

Cébrano debe a los y les sos trabayadores, tres nómines y, n’anteriores xuntes, la empresa ufiertóse a roblar un documentu comprometiéndose a abonar, nel mes de setiembre, la nómina del mes de xunetu y la paga extra de branu, pero condicionando esti pagu al abonu d’una subvención que’l Gobiernu autonómicu tien pendiente cola empresa Cébrano.

Sicasí, la empresa reconocía que nun tenía nenguna garantía de que’l Principáu abonara nel mes de setiembre dicha subvención. D’esta manera, les y los trabayadores siguíen ensin tener nenguna seguridá llegal de cobrar les nómines pendientes.

Amás, la empresa reconoció que, de magar ochobre, nun garantizaba’l pagu de nenguna nómina más. A tou ello, hai qu’añedir que la empresa siguió negándose a apurrir les previsiones d’ingresos y gastos correspondientes a los meses que queden hasta rematar l’añu y a ellaborar, xuntu coles y los trabayadores, un plan de viabilidá pa la continuidá’l Centru.

Coles mesmes, ensin denguna garantía de cobru nin de continuidá del Centru, los y les trabayadores van siguir alantre cola fuelga convocada.

Entendemos los trestornos qu’esta fuelga puede causar a les persones usuaries del Centru y a les sos families, pero tenemos el comencimientu de que si nun tomamos les midíes oportunes, vamos tar poniendo en pelligru, non yá los puestos de trabayu, sinón la mesma continuidá’l Centru.

Pa les y los trabayadores, la solución a esti conflictu pasa por que la empresa CÉBRANO camude d’actitú. CÉBRANO tien d’asumir les sos responsabilidaes económiques, “faer los sos deberes” ante’l Gobiernu autonómicu y poner fin a esta situación, garantizando’l pagu de los salarios, esplicando a la plantía y a les families de les persones usuaries, la situación económica real de la empresa y ellaborando un plan de viabilidá que de continuidá al Centru y al cuidu de les persones que dependen d’él.