Seguimientu mayoritariu de la plantía de Cébrano nel 2º día de fuelga

Nel segundu día de fuelga, la plantía de la empresa CÉBRANO secundó mayoritariamente’l paru llaboral. Namás trés trabayadores (más otres dos, obligaes polos servicios mínimos) entraron güei a trabayar.

Sicasí, el Comité de Fuelga va presentar mañana una denuncia escontra la empresa, énte l’autoridá llaboral, por sustituyir con “voluntarios” a el trabayadores y trabayadores qu’exerciten el so derechu a fuelga. La normativa llaboral en materia de fuelga, prohibe tayantemente la sustitución de trabayadores en fuelga por personal ayenu a la empresa.

Pal Comité de Fuelga, la empresa ta cometiendo actos illegales que van ser denunciaos y van tener la so correspondiente sanción.

Mañana, xueves 22 d’agostu, la plantía va reincorporase al so trabayu, pero si la empresa nun ufierta denguna alternativa a les y los trabayadores, la fuelga va siguir los próximos díes 27 y 28 d’agostu, tal como taba convocada.

Demientres esta selmana, el Comité de Fuelga va entrevistase colos grupos políticos municipales, col enfotu de llevar les sos reivindicaciones hasta la Conseyería de Bientar Social y el Parllamentu Asturianu.

Pa les y los trabayadores, la solución a esti conflictu pasa por que la empresa CÉBRANO camude d’actitú. CÉBRANO tien d’asumir les sos responsabilidaes económiques, “faer los sos deberes” énte’l Gobiernu autonómicu y poner fin a esta situación, garantizando’l pagu los salarios, desplicando-yos a la plantía y a les families de les persones usuaries, la situación económica real de la empresa y ellaborando un plan de viabilidá que de continuidá al Centru y al cuidu de les persones que dependen d’él.