Concentración de sofitu a los trabayadores en fuelga de Cébrano

Arranca con fuerza la huelga en la empresa Cébrano.

De les y los 15 trabayadores convocaes a la fuelga na empresa CÉBRANO, de Siero, namás trés entraron a trabayar (más otres dos, obligaes polos servicios mínimos).

Los y les trabayadores concentráronse nel mercáu de La Pola pa informar a la opinión pública sobre les razones pola que se ta desendolcando esta fuelga.

Mañana, miércoles 21 d’agostu, sigue la fuelga y los y les trabayadores van concentrase na plaza’l Conceyu de Siero, onde van intentar caltener xuntes colos estremaos grupos municipales del Conceyu.

El Comité de Fuelga ta estudiando denunciar a la empresa por posibles illegalidaes cometíes por CÉBRANO, como la contratación de tresporte ayenu a la empresa pa les persones usuaries del Centru o l’usu de “voluntariáu” pa realizar trabayos y funciones que correspuenden a los y les trabayadores en fuelga.

Ayeri, llunes 19 d’agostu, cellebróse otra xunta ente la plantía, la empresa y l’Alcalde de Siero, como mediador nel conflictu.

Nesta xunta, la empresa ufiertóse a roblar un documentu comprometiéndose a abonar, nel mes de setiembre, la nómina’l mes de xunetu y la paga extra de branu, pero condicionando esti pagu al abonu d’una subvención que’l Gobiernu autonómicu tien pendiente cola empresa Cébrano.

Sicasí, la empresa reconocía que nun tenía denguna garantía de que’l Principáu abonara nel mes de setiembre tala subvención. D’esta manera, los y les trabayadores siguíen ensin tener denguna seguridá llegal de cobrar les nómines pendientes.

Amás, la empresa reconoció que, de magar ochobre, nun garantizaba’l pagu de denguna nómina más. A too ello, hai qu’amestar que la empresa siguió negándose a apurrir les previsiones d’ingresos y gastos correspondientes a los meses que queden hasta rematar l’añu y a ellaborar, xuntu coles y colos trabayadores, un plan de viabilidá pa la continuidá’l Centru.

Coles mesmes, ensin denguna garantía de cobru nin de continuidá del Centru, les y los trabayadores vamos siguir alantre cola convocatoria de fuelga anunciada.

Entendemos los trestornos qu’esta fuelga puede causar a les persones usuaries del Centru y a les sos families, pero tenemos el convencimientu de que si nun tomamos les midíes afayaíces, vamos tar poniendo en pelligru, non yá los puestos de trabayu, sinón la mesma continuidá’l Centru.

La empresa CÉBRANO nun puede siguir enrocada na so actitú. Tien d’asumir les sos responsabilidaes económiques, “faer los sos deberes” énte’l Gobiernu autonómicu y poner fin a esta situación, garantizando’l pagu de los salarios, desplicando a la plantía y a les families de les persones usuaries, la situación económica real de la empresa y ellaborando un plan de viabilidá que de continuidá al Centru y al cuidu de les persones que dependen d’él.