Cajastur: Concentración delante de la OP de Gijón

Los trabayadores de Cajastur/Liberbank
nun tamos de vacaciones, tamos nel paru

Pa siguir denunciando’l brutal plan d’axuste que nos aplica Manuel Menéndez y por que los nuesos veceros y la sociedá polo xeneral sepan el motivu real pol que nun tamos nes oficines (non vaya a ser qu’enriba de tar sufriendo estos retayos selvaxes, créanse, como pretenden dellos jefecillos, que somos unos señoritos que pasamos meses y meses de vacaciones), los sindicatos CSICA, STC y CSI convocamos, coincidiendo colos díes de regulación d’empléu, diversos actos de protesta.

El primeru d’ellos va tener llugar el martes 20 d’agostu en Xixón. Convocamos esi día a tolos compañeros en periodu de suspensión d’empléu a concentrase delantre de la OP de Xixón a les 11 de la mañana, para dende ende, llevar a cabu una ruta pel centru de la ciudá con paraes nes distintes oficines, esplicando lo qu’asocede na nuesa entidá y señalando a los culpables d’esta situación y a los sos cómplices políticos y sindicales.

Ye importante que nun quedemos en casa ablayaos nin derrotaos, como ellos quieren. Salamos a la cai cola cabeza bien alta a reivindicar la nuesa dignidá como trabayadores y como persones. Que sían esos delincuentes de pescuezu blancu que pretenden esquilmanos los que tengan qu’escondese.

Ellí vemos.

CSI-CAXASTUR