¡Nin despidos, nin pieslles, nin abusos patronales!

Comunicau de los y les trabajadores de la empresa Cébrano:

Les y los trabayadores de l’Asociación d’Afectaos por Mancadura Cerebral Sobrevenida CÉBRANO, asitiada en Carbayín Alto, nel conceyu de Siero, decidimos movilizanos y faer pública la nuesa situación d’impagu continuáu de salarios, ensin que la Xunta Direutiva d’anguañu nos dea les desplicaciones que xustifiquen debidamente la nuesa precaria situación llaboral.

Nestos momentos, CÉBRANO débenos tres nómines, que nun sabemos cuándo vamos cobrar. Los meses siguen pasando, la situación nun ameyora y la empresa sigue ensin pagar los nuesos salarios y ensin poner nenguna midía que corrixa l’actual situación.

Amás d’ello, nun se contrata personal pa cubrir vacaciones y baxes, polo que sufrimos sobrecarga de trabayu, realizando funciones que, por conveniu, nun nos correspuenden.

CÉBRANO niégase a informar de la situación económica de la empresa a los representantes sindicales de la plantía y la única solución que se-y ocurre ye llanzar amenaces de baxaes de sueldu coleutives (que yá de por sí son bien baxos) o de pieslle del centru de trabayu.

¡BASTA D’ABUSOS EMPRESARIALES!. ¡POLA DEFENSA DE LOS NUESOS DERECHOS Y DE LOS NUESOS PUESTOS DE TRABAYU!