Protesta de delegaos sindicales de CSI-TENNECO escontra’l fraude de les mutues

LES MUTUES: LOS MERCADERES DE LA SALÚ

Los delegaos sindicales de la CSI na empresa Tenneco Automotive realizaron una protesta pol fraude qu’apareyen les mutues, bien especialmente la mutua FREMAP.

Pa la CSI, les mutues nun son otra cosa que mercaderes de la salú. Quien tendríen de curiar de la salú nel trabayu, comercien con ella y tórnenla nun negociu.

Nel Estáu español muerren al añu alrodiu de 14.000 homes y más de 2.000 muyeres por enfermedaes contrayíes nel llugar de trabayu. Y denguna d’elles apaez nel rexistru oficial de muertes por causa llaboral de tales mutues. Esto quier dicir que les mutues nun paguen les compensaciones debíes a los familiares de los finaos, algamando unos beneficios millonarios.

Les mutues abandonen a les y los trabayadores a la so suerte y estáfennos esviando los casos d’enfermedaes llaborales escontra la Seguridá Social, aforrando miles de millones d’euros.

El 18% de les enfermes y enfermos hospitalarios tienen enfermedaes llaborales. El costu pal serviciu públicu sanitariu d’atender a estos enfermos y enfermes por causes llaborales representa un 20% de tol gastu sanitariu.

Asina, demientres los y les trabayadores enfermen y muerren nel trabayu, les mutues algamen unos beneficios que ronden, a lo menos, los 5.000 millones d’euros añales.

¡BASTA DE FAER NEGOCIU COLA SALÚ Y LA MUERTE DE LES Y LOS TRABAYADORES!.

CSI-TENNECO