Concentración de sofitu nel actu de conciliación del responsable de la seición sindical de la CSI n’Instalaciones Eléctricas Sanvicente

Güei, miércoles 24 xunetu, tuvo llugar l’actu conciliación pol despidu’l responsable de la SeIción Sindical de la Corriente Sindical d’Izquierda na empresa Instalaciones Eléctriques Sanvicente S.L. de Xixón (Asturies).

Nesta conciliación, la empresa reconoció la improcedencia’l despidu, ufiertando la indemnización correspondiente, pero’l trabayador refugó esta ufierta y desixó la so reincorporación al puestu de trabayu.

Pa la CSI, esti despidu vien motiváu, en realidá, pola actitú del responsable sindical en defensa de los derechos de les y los trabayadores, la denuncia de los incumplimientos del conveniu coleutivu y la denuncia énte Inspección de Trabayu de la realización d’hores estres illegales na empresa.

Preba de la persecución sindical de la empresa Sanvicente escontra esti trabayador, ye’l fechu de que foi despidíu darréu notificase a la empresa la so condición de representante sindical de la CSI.

Pa la CSI, el despidu del so responsable sindical nun ye denguna casualidá, sinón la consecuencia de la so actitú decidida en defensa de los derechos obreros y de denuncia de los abusos empresariales, cada vegada más xeneralizaos.

Un altu direutivu de la empresa, declaraba ante un grupu de trabayadores que “había que trabayar de baldre, si yera necesariu, pa llevantar España, lo mesmo que fixo Alemaña dempués de la Guerra Mundial”.

Por tou ello, la CSI va defender xudicialmente y cola movilización y la protesta na cai, non sólamente al so responsable sindical, sinón a cualquier trabayador o trabayadora que sía oxetu de represalies por defender los sos derechos.

CSI-SANVICENTE. ¡NIN DESPIDOS NIN PIESLLES!