La marcha violeta percorrió esti sábadu les cais de Xixón

Esti sábadu 13 de xunetu percorrimos les cais de Xixón cola marcha-manifestación violeta “Muyeres en pie, Asturies en pie”, siguiendo la campaña “Asturies en pie”, que diferentes sindicatos alternativos y coleutivos sociales venimos faciendo durante esti añu.
Pasamos polos llugares que representen lo que güei tamos sufriendo la mayor parte la sociedá: Servicios sociales,sede PP, Caxastur, Iglesiona, colexu priváu Santo Angel, Ayuntamiento, Femetal, Xuzgaos, y Semana negra
Una marcha violeta que pa los coleutivos que trabayamos y peleamos en comuña parecíamos perimportante, porqu’en mediu del paru xeneralizau, la precariedá y la pobreza que se ceben cola tercera parte la población…
La sanidá, la educación, los servicios sociales, les pensiones, los drechos llaborales, la vivienda, y un llargu etc que comiencen a ser drechos del pasáu. Tamos perdiendo lo que tantos sieglos costó consiguir.
Porqu’en mediu d’una mal llamada “deuda pública”, d’una crisis que ye una estafa, y de que veamos día sí y día también como’l dineru que mos dicen que nun hai desaparez poles alcantarilles de la corrupción.
Y de que prefieran que mos suicidemos porque si protestamos recibimos multes, palos, detenciones, cárcel,…
En mediu de too esto, les muyeres sufrimos una vuelta de tuerca más.
Los asesinatos y agresiones a les muyeres ya formen parte del paisaxe. Nun son accidentes, son crímenes, y hai qu’acabar con ellos. Nun vamos mirar pa otru lláu. Nin una agresión, nin una muerte más.
Quisieron primero refomar la llei del albortu, ahora quieren que seya anticonstitucional. La llibertá d’elección de les muyeres pasa pola llegalización de la interrupción voluntaria del embarazu, de forma llibre, llegal, segura y gratuita. Y anque quieran cambiamos el vocabulariu, nós sí somos próvida, defendemos que tanto les muyeres que nun quieran ser madres cómo les que sí quieran tengan les meyores condiciones pa facelo: con una sanidá y una educación pública y de calidá, unos servicios sociales y una xusticia que nun mos convierta en estadístiques sinon que ten al serviciu de les persones.
– Quieren qu’albortu seya anticonstitucional pero llueu mos echen del trabayu cuando tamos embarazaes. Esto xuntase a una mayor tasa de paru, menor sueldu nel mesmu trabayu, la imposibilidá de conciliar vida familiar y convenios coleutivos nos que l’actividá de la muyer ye mayoritaria como n’ayuda y trabayu a domiciliu, llimpieza, xeriátricos,… seyan los más precarios en drechos. Son exemplos d’una desigualdá a la qu’hai que poner fin. Queremos IGUAL TRABAYU, IGUAL SALARIU, IGUAL CONSIDERANCIA SOCIAL.
La iglesia vuelve a metese, y fasta la escuela quieren poner amás de pala xente rico, dividia, segregada en sexos, (en clases sociales ya lo tá faciendo y pol orixen o la procedencia nun tardaran). Fuera la iglesia de la vida y les decisiones publiques.
Queremos acabar colos estereotipos machistes que nos conderguen a les muyeres a cómo vistir, cómo actuar, cómo ser, cómo pensar…Y cola propaganda machista de los medios de comunicación que dexen a la muyer nuna posición d’inferioridá. Cómo un obxetu.
Por toes eses coses, y munches más vamos salimos a la cai una vez más toes y toos en comuña.
Porque los derechos consígense y deféndense lluchando.
Porque tan desmantelando Asturies, porque tamos escontra los desahucios, el racismu, el fascismu y el machismu.
Por eso esti sábadu percorrimos Xixón, con allegría y ensin tabues, denunciando ente toes y toos les desigualdaes.
Recuperemos na cai lo que mos roben nos despachos.
Rompamos les cadenes, rompamos les desigualdaes.
Muyeres en llucha, Asturies en pie.