Marcha-Manifestación Violeta “MUYERES EN PIE” “Asturies en pie”

Más de 6 millones de paraos y paraes nel Estáu español y más de 125.000 n’Asturies, coles sos families, suponen la fame pa la tercer parte la población.
El paru, la precariedá y la probitú cébense cola clas obrera. La Sanidá, la Educación, los Servicios Sociales y los drechos llaborales entamen a ser parte’l pasáu y, agora, tán saqueando les pensiones.
Banqueros, especuladores, grandes empresarios, millonarios…, quieren que paguemos la cris qu’ellos crearon. La mal llamada “delda pública” ye la so delda: que la paguen ellos, porque ellos son los braeros criminales. Mentanto, el dineru que precisamos pa sobrevivir, súmese peles alcantarielles de la corrupción.
Y si protestamos, recibimos multes, palos, detenciones y cárcele. Pero, metanes tou esto, les muyeres sufren una vuelta tuerca más
Los asesinatos y agresiones a les muyeres yá formen parte’l paisaxe. Nun son accidentes, son crímenes: ¡tolerancia cero!.
La Reforma de la Llei del Albuertu pretende tornar a les muyeres en madres, quieran o non. La llibertá d’elleición de les muyeres pasa pola llegalización de la interrupción voluntaria l’embarazu, de forma llibre, llegal, segura y de baldre.
Los derechos llaborales y sociales de les muyeres nin siquier lleguen al murniu nivel que tienen los homes. La superior tasa paru, el menor sueldu pol mesmu trabayo que l’home, la imposibilidá de conciliar vida familiar y llaboral, los despidos por embarazu o’l fechu de que los convenios colectivos nos que l’actividá de la muyer ye mayoritaria (ayuda y trabayu a domiciliu, llimpieza, xeriátricos, etc.) sían los más precarios en drechos, son exemplos d’una desigualdá a la qu’hai que poner fin.
Ye hora de frayar les cadenes. Ye hora de ponenos en pie, de remangarnos y ganar na cai lo que nos roben nos despachos.

CSI