¡Nin despidos, Nin pieslles!

Con 126.000 trabayadores en paru, Asturies nun puede permitise nin un solu despidu nin un solu pieslle d’empresa más.

El pocu trabayu qu’hai ye precariu , casi siempres ensin cotización a la Seguridá Social pa toles hores trabayaes, con sueldos que nun merecen esi nome, con escesu d’hores de trabayu so menacies de despidu, con parte’l sueldu pagáu en prietu, etc.

Y, sicasí, empreses con beneficios demosaos siguen despidiendo y faciendo EREs que, a la fin, pagamos ente toes y toos al traviés del FOGASA.

Y si protestes o desixes el más mínimu drechu llaboral, yá sabes lo que te espera: tas na cai.

Los despidos de los responsables de les seiciones sindicales de CSI nel taller de Barros de Duro-Felguera o na empresa Sanvicente, son una bona preba d’ello.

Col lema “Nin despidos nin pieslles”, y col logo que veis na semeya d’embaxu, la CSI va entamar una campaña de movilización permanente escontra los despidos y los pieslles d’empresa. Hai qu’echar la galga a la impunidá empresarial, xuniendo les lluches y engarrando escontra cada despidu que se produza en cualisquier empresa.

Trátennos como si fuéramos una simple ferramienta cola que caltener en funcionamientu’l so engranaxe de beneficios, pero una simple ferramienta puede atascar y faer mugayes hasta’l engranaxe más poderosu.

¡NIN DESPIDOS NIN PIESLLES!. ¡NIN UNA PARADA NIN UN PARÁU MÁS NIN UN PUESTU TRABAYU MENOS!.