Arranca la campaña escontra’l despidu nel taller de Barros (Duro-Felguera) y escontra’l pieslle de los Talleres de Duro-Felguera

El responsable de la Sección Sindical de la Corriente Sindical d’izquierda en Felguera Construcciones Mecániques (Taller de Barros) de la empresa Duro-Felguera foi despidíu’l pasáu 10 de mayu de 2013.

Nun ye la primer vegada que Duro-Felguera persigue a esti trabayador. Anteriormente, la empresa abrió-y espediente disciplinariu por estremaos enfrentamientos xurdíos pola actitú del trabayador en defensa de los drechos llaborales. Nel xuiciu cellebráu posteriormente, el xulgáu dio-y la razón al trabayador, tirando embaxu talu espediente y considerándolu una represalia de los drechos sindicales.

Anguañu, el trabayador atopábase baxu ún de los contratos-relevu apautaos pola Empresa y los Comités, que obliga a la empresa a anovar automáticamente talu contratu nel intre nel que se cumplan les condiciones afitaes pal relevu.

La Empresa incumplió talu alcuerdu y despidió de forma illegal al trabayador, dexando nel aire non sólo esti contratu, sinon tamién el futuru de los puestos de trabayu del restu trabayadores que s’atopen en contratu-relevu.

Pa la CSI, esti despidu ye un nuevu casu de represión sindical en Duro-Felguera, que persigue y despide a cualisquier trabayador que denuncie cualisquier abusu de la empresa.

El responsable de CSI nel taller de Barros denunciare, énte la Inspeición de Trabayu, abondos incumplimientos de la empresa y destacare pola so oposición a los tresllaos de plantía y los planes empresariales de pieslles de talleres.

El representante de la empresa Duro-Felguera foi pernidiu y aconseyó al trabayador aceutar una cantidá de perres “porque esto ye lo másimo que puedes sacar; la empresa va pesllar los talleres, yá lo dixo’l propiu presidente’l Grupu Duro-Felguera”.

El trabayador despidíu refugó de les ufiertes económiques realizaes pola empresa pa qu’arrenunciare al so puestu trabayu, desixendo la so realmisión darréu.

La CSI camienta que nun podemos permitinos nin un solu paráu o parada más n’Asturies y anunciamos que vamos defender, con tolos medios al nuesu alcance, a cualisquier trabayadora o trabayador despidíu y represaliáu por defender los puestos de trabayu y los drechos de la clas obrera.