Nuevu casu de represión sindical a la CSI

El responsable de la Seición Sindical de la Corriente Sindical d’Izquierda na empresa Instalaciones Eléctriques Sanvicente S.L. foi despidíu esta selmana, cola escusa de falta de carga de trabayu. Sicasí, la empresa, subcontratada por HC-Enerxía, tien contratada obra, a lo menos, hasta avientu.

Pa la CSI, esti despidu vien motiváu, en realidá, pola actitú del responsable sindical en defensa de los derechos de les y los trabayadores, la denuncia de los incumplimientos del conveniu coleutivu y la denuncia énte Inspección de Trabayu de la realización d’hores estres illegales na empresa.

A esti casu hai d’amestar l’acabante despidu del responsable de la Seición Sindical de la CSI nel taller de Barros de Duro-Felguera, despidíu, tamién de forma illegal, poles sos continues denuncies de los planes empresariales de zarru de los talleres de Duru.

Pa la CSI, el despidu de los sos responsables sindicales nun ye denguna casualidá, sinón la consecuencia de la so actitú decidida en defensa de los drechos obreros y de denuncia de los abusos empresariales, cada vegada más xeneralizaos.

Nin estos despidos, nin les sanciones económiques impuestes pola Delegación de Gobiernu, nin los deteníos ya imputaos demientres les movilizaciones, nin cualesquier otra forma represión, van obligar a la CSI a dar nin un pasu tras na so llucha polos drechos de la clas obrera.

Por too ello, la CSI va defender xudicialmente y cola movilización y la protesta na cai, non sólamente a los sos responsables sindicales, sinón a cualquier trabayador o trabayadora que sía oxetu de represalies por defender los sos drechos.